CEBU, Philippines - Gironda sa kapolisan ang usa ka telecommunications company nga migamit sa linya sa laing telecommunications company tungod sa paglapas sa Republic Act 8484 kon Access Device Regulation Act of 1998.
Gidala sa kapolisan sila si Rebecca Paracuelles, nga giingong maoy operator sa We Talk Direct I.T. Services ug ang technician niini nga si Arjie Abendula uban sa gisakmit nilang mga ekipo sa komunikasyon diha sa ilang buhatan sa dalan Don Pedro Cui sa barangay San Antonio sa dakbayan sa Sugbo.
Ang buhatan sa Criminal Investigation and Detection Group nakadawat og reklamo gikan sa Globe Telecoms nga naalkanse sila tungod sa operasyon sa maong telecommunications company nga migamit sa ilang access.
Nakakuha og search warrant ang CIDG-7 gikan ni Regional Trial Court Judge Eric Menchavez sa Branch 21 nga penetsahan og Pebrero 13. Matud pa sa Security Operations Specialist sa Globe Telecoms nga si Jojo Viray nga ang maong kompanya mi-apply kanila og 31 ka postpaid plan accounts.
Apan nabantayan sa ilang Fraud Security Management nga pulos lang incoming calls ang narehistro sa paggamit sa maong mga accounts hinungdan nga ila kini nga gipaubos sa surveillance. Matud pang Viray gi-divert sa maong kompanya ang international calls sa ilang system ug mahimo kini local call ini og abot sa subscribers. Ang kompanya maoy mokolekta sa bayad.
“So sa international calls, sila na ang kumikita. Ang kikitain namin is ang local rate na,†matud pa ni Viray.
Tungod niini naalkanse ang ilang kompanya og kapin P3 million sukad niadtong 2011 dihang nagsugod ang We Talk Direct I.T. Services. Nasuta usab nga dili rehistrado sa National Telecommunications Commission (NTC) ang maong kompanya ug aduna kini kaugalingong broker sa abroad nga maoy mo-serbisyo sa ilang mga callers. Gisuwayan sa mga sakop sa media og kuha ang habig sa duha ka dinakpan apan nagdumili sila pagtubag sa mga pangutana. (BANAT NEWS)