CEBU, Philippines - Gitakda nga ang Pebrero 25, adlaw’ng Lunes mao lamang ang nag-inusarang holiday nga masinati ning tuiga nga walay klase sa tanang lebel sa tunghaan.
Sumala pa sa taga Department of Labor and Employment (DOLE) nga kining maong petsa usa usab ka ordinaryong adlaw alang sa trabaho diin walay premium o overtime pay nga giluwatan nga ibayad alang sa mga motrabaho ning maong adlaw.
Samtang sa laing bahin ang taga DOLE nagkanayon nga ang mga empleyado sa pribadong tunghaan, academic o administrative personnel gitakdang pagabayran subay sa reglamento nga gisaysay sa paghatag og premium nga bayad sa mga trabahanteng motrabaho sa espesyal nga non-working day base subay sa Labor advisory no. 6 series of 2012.
Ang petsa 25 sa Pebrero gideklarar usab nga People Power Day agi og pagtamud sa 1986 EDSA Revolution nga nakapalagpot ni kanhi presidente Ferdinand Marcos ug pagpalig-on sa demokrasya sa Pilipinas.
Ang People Power Revolution gitawag usab isip Yellow Revolution tungod sa presensya sa mga yellow ribbon atol sa mga demonstrasyon human sa pagkamatay ni kanhi senador Benigno Aquino Jr.
Ang maong mga panghitabo maoy simbolo sa kadaugan sa mga tawo batok ni Marcos kinsa naghupot katungdanan isip presidente sa nasud sulod sa 20 anyos. (BANAT NEWS)