DUMAGUETE CITY , Philippines – Gikompirmar sa Coast Guard station sa Dumaguete nga naguba ang power barge sa kuryente sa Siquijor province ug duha ka commercial barges sa Amlan, Negros Oriental ang nangaguba tungod sa bagyong Pablo sayo ning semanaha.
Tungod niini miabot na og unom ka mga sakyanan sa dagat ang naguba o nalunod sa Negros Oriental ug Siquijor .
Wala hinuoy nakalas o nasakitan sa pagkaguba sa mga barges sa Negros matud pa sa Coast Guard.
Ang duha ka commercial barges, nagbiyahian sa Negros Oriental-Cebu tabok sa Tañon Strait nga nagaid sa Tandayag Wharf sayo pa niadtong Lunes apan napadpad kini sa baybayon ug ang usa naunlod ang katunga human nasudlan og tubig.
Sa pagkakaron padayon pang gi-repair ang maong mga barges aron kini makabiyahe pag-usab.
Samtang ang power barge sa National Power Corporation (NAPOCOR) nga nagsuplay og kuryente sa Siquijor nasangad usab tungod sa bagyo diha sa gikahimutangan niini sa lungsod sa Lazi. (/EIM) (BANAT NEWS)