Abueva taktakon sa Gilas
CEBU, Philippines - Gipasidan-an ni Gilas Pilipinas coach Chot Reyes ang star player sa Alaska Aces nga si Calvin Abueva nga iya kining taktakon sa nasudnong koponan kon dili gihapon kini motunga sa praktis.
Si Abueva gikataho nga wala pa gyud moensayo sa national team nga molarga sunod semana didto sa Lebanon alang sa FIBA Asia Cup.
Naapil si Abueva sa Final 12 sa Gilas nga morepresentar sa Pilipinas sa FIBA Asia, apan siya na lang ang wala pa makaapil sa ensayo ug wala usab kini gipadangat nga mensahe nganong wala pa siya katunga.
“Wala paring balita,” matud pa ni Reyes sa The Philippine STAR. “If he doesn’t come by in training we're gonna be forced to drop him. We have no other recourse.”
Kon siya ang pabut-on, si Reyes dili gyud gusto nga motaktak ni Abueva, apan kinahanglan niya nga moaksiyon ilabi na nga apeke pa gyud sila sa preparasyon alang sa maong torneyo.
Si Abueva gamit kaayo sa Gilas tungod sa iyang depensa ug kalagsik. Sa miaging kampanya sa Gilas sa SEABA Championship, si Abueva mi-average og 13.8 points ug 5.3 rebounds.
Si Reyes miingon nga dako unya niya nga problema kun mawala si Abueva tungod kay magkara-kara siya pagpangita og ipuli sa posisyon niini.
Gikataho nga si Abueva wala sab moduwa sa iyang mother team sa PBA nga Alaska niadtong miaging semana batok sa Star Hotshots. (BANAT NEWS)
- Latest