CEBU, Philippines — Usa ka babaye ang naposasan sa mga operatiba sa NBI, niadtong Hulyo 21 human giingong nagbaligyag shabu sa usa ka lugar nga duol sa mga eskwelahan diin kasagaran niyang kostumer mga drayber ug konduktor sa pampublikong sakyanan.
Ang suspetsado giila nga si alyas Gloria, residente sa Nangka Ville, Barangay Quiot, Pardo, Cebu City. Sumala sa NBI, dugay na silang nakadawat og impormasyon nga adunay namaligyag ilegal nga drugas sa maong lugar diin kasagarang kostumer ang mga drayber, konduktor ug duna say alegasyon nga apil usab ang pipila ka estudyante sa kasikbit nga mga eskwelahan ang tigpalitan kaniya.
Si NBI-CEVRO agent-on-case Atty. Wenceslao Galindez miingon nga dili kasagaran nga moapil ang ilang opisina sa anti-drug operations apan nakadesisyon silang molihok tungod sa dakong hulga niini sa komunidad.
"Ang rason nganong gihimo namo kini nga operasyon kay dako ang epekto niini sa mga negosyo ug komunidad nga naglibot sa maong lugar," matud ni Galindez.
Dugang pa niya, duol ang maong dapit sa labing menos tulo ka eskwelahan ug usa ka bus terminal.
"Sa among case buildup, ang namalit niya og droga mao ang mga bus driver, bus conductor ug mga estudyante. Mao nga makapakurat ug makabalaka kaayo kini," pasabot niya. Gibutyag usab ni Galindez nga ang suspek magpakaaron-ingnong manglimos aron dili madudahan.
Atol sa operasyon, narekober sa mga operatiba ang unom ka sachet sa gidudahang shabu, duha ka P100 nga marked money, P1,900 nga kuwarta ug usa ka National ID sa suspek.
"Dili man dako ang kantidad sa droga pero ang hulga niini sa publiko maoy among gikabalak-an. Delikado kung ang mga drayber sa pampublikong sakyanan maoy mogamit og droga samtang nagmaneho," matud niya.
Sa iyang bahin, miangkon matud pa ang suspek nga namaligya siya og droga sa mga drayber ug konduktor, apan iyang gihimakak nga namaligya siya ngadto sa mga estudyante.
Matud pa niya, nagsugod siya ani niadtong Marso human namatay ang iyang anak ug nalubong kini sa utang. Kasong pagbaligya ug pagpanag-iya og ilegal nga droga ubos sa Republic Act No. 9165 ang gipasaka batok niya diha sa Cebu City Prosecutor's Office. Sa laing bahin, duha ka gidudahang drug personalities ang nadakpan human nasakmitan og gibanabanang 70 gramos sa gidudahang shabu nga adunay street value nga ?476,000 atol sa anti-illegal drug operation nga gilusad sa Regional Police Drug Enforcement Unit 7 (RPDEU7) sa kaadlawon sa Biyernes sa Visitation Street, Barangay Sambag 2, Cebu City. Ang mga nadakpan giila lamang sa ilang mga alyas nga "Tomas," 33 anyos, residente sa Talisay City, ug "Parak," 43 anyos, residente sa Barangay Sambag 1, Cebu City.
Base sa imbestigasyon sa RPDEU7 makabaligya sila og 100 hangtod 200 gramong shabu sa kada semana diha sa barangay Sambag 2, Cebu City, ug sa Talisay City.Giingong ang supplier sa mga suspek naa sa prisohan sa Abuyog, Leyte nga ilaha na karong gisubay.— IBM BANAT