9 drayber ‘sakpang nakainom

CEBU, Philippines — Siyam ka mga driver  ang nangadakpang nagmaneho nga nakainom atol sa joint road safety operation nga gipahigayon sa Land Transportation Office (LTO) Region 7 ug Philippine Coast Guard (PCG) sa Cebu City niadtong Abril 11, 2026.

Gihimo ang checkpoint diha sa F. Cabahug Street kauban sa mga sakop sa LTO Central Office ug PCG – Special Operations Task Group (SOTG) ubos sa direktiba ni LTO Assistant Secretary Markus V. Lacanilao, ug PCG-SOTG Col. E.A. Arcilla (Ret.), ug LTO Regional Director Wendel C. Dinglasan. Sumala pa sa LTO-7 nakaisyu sila og 49 ka Temporary Operator’s Permits (TOPs) nianang gabhiuna ug 54 ka traffic violations ang ilang natala. Ang mga sakyanan ug motor sa mga malapason gi-impound ug gi turnover  ngadto sa Cebu City Transportation Office’s Traffic Enforcement Unit.

Gipahibalo sab sa LTO-7 nga sugod karong adlawa, Abril 14, mopahigayon sila og “Friendly Flag Down” nga ang tuyo mao ang mga sakyanan ug mga motor nga wala pa gihapoy opisyal nga mga plaka aron sila tabangan nga makuha kini.

Tudloan sila kung unsay hustong proseso aron ilang makuha ang ilang mga plaka. — IBM