DOLE: Trabahante pwedeng mo-absent tungod sa kainit

CEBU, Philippines — Mamahimong dili motambong sa trabaho ang mga trabahante kung gusto silang molikay niining grabeng kainit sa panahon, apan dili sila makadawat og sweldo anang adlawa.

Mao kini ang pamahayag ni Labor Secretary Bienvenido Laguesma,  ubos sa Department of Labor and Employment (DOLE) Advisory No. 17-2022,  nga nag-ingong dunay opsyon ang mga trabahante nga di motambong sa trabaho o mo-absent tungod sa grabeng kainit sa panahon.

"Extreme heat is a form of weather disturbance, like El Niño. If reporting will expose the worker to danger, whether actual or imminent, then the worker is justified not to report or render work,"matud pa niya.

"(This is) not simply because of extreme heat but also due to unsafe and unhealthy conditions," dugang pa niya.

Matud pa niya, ang konseptyong “ imminent danger” pwedeng himuong rason sa tanang matang sa dili luwas nga kondisyon tungod sa katalagmang binuhatan sa tawo sama sa giyera, o dala sa kinaiyahan sama sa El Niño ug uban pa.

Kun mao kini ang rason sa pag-absent dili mahimong pahamtangan og silo tang kawani apan dili sila makadawat og sweldo anang adlawa, gawas nalang kun maayo ilang kompanya o adunay collective bargaining agreement o ba kaha baylo kini sa ilang accrued leave credits.

Hinuon gipasidan-an ni Laguesma ang mga kawani nga pahibaw-on gyud ilang trabahoan aron dili magkaproblema.