Sinulog idol judge gipatay
CEBU, Philippines — Napalgang wala na’y kinabuhi sa kilid sa dalan ang usa ka sakop sa LGBTQ+ nga nahimo pa kaniadtong usa sa mga hurado ug mentor sa Sinulog Idol diha sa Sitio Palanas, Barangay Inayagan sa Dakbayan sa Naga kagahapon sa kaadlawon, Sabado, Disyembre 30, 2023.
Giila ang biktima sa iyang mga kabanay nga kini mao si Joel Jude Suson Unchuan alyas Coach J, 46, molupyo sa Queen Road, Barangay Kamputhaw, Dakbayan sa Sugbo.
Sa inisyal nga impormasyong gihatag sa Naga City Police Station, nakit-an ang patay’ng lawas sa biktima kaadlawon diha sa kasagbutan nga nagsul-ob og boxer shorts ug black T-shirt unya gigapos matud pa ang duha ka kamot. Dunay mga timailhang gibun-og kini tungod sa mga nakitang mga lagom-lagom sa isi’g ka kilid sa iyang tiyan. Gisusi sab kun gituok ang biktima kay dunay agi nga sama’g gituok kini og pisi.
Mingaw ang lugar kun diin napalgan ang biktima ug layo sa mga kabalayan.
Ang mga higala ug kabanay sa biktima mipalanog sa ilang panawagan og hustisya pinaagi sa social media.
“Coach Jay Unchuan has been the panel, mentor, and judge since it’s first leg, 15 seasons ago. Thank you for mentoring each and every Sinulog Idols, shaping them to be the better version of themselves, both on and off stage.
Sinulog Idol will never be the same without you..” matud pa sa Facebook Page sa The Sinulog Idol. Ang kapolisan padayon pang nanghipos og mga dugang impormasyon kalabot sa nahitabo kang Unchuan. (BANAT NEWS)
- Latest
