200 ka kawani sa CTO gipaubos sa kinalit nga drug test

CEBU, Philippines — Gipaubos sa kinalit nga drug test ang 200 ka sakop sa City Treasurers Office sa Dakbayan sa Sugbo sa Cebu City Office on Substance Abuse Prevention (COSAP) atol sa ilang gipahigayon nga Strategic Planning and Assessment for 2023 and Forward Planning for 2024.

Matud sa pangulo sa CTO Mare Vae Reyes nga matag tuig ang pahigayon nila og drug test sa mga empleyado aron sa pagsiguro nga wala sila’y trabahante nga naulipon sa ginadili nga drugas ilabi na nga naghupot kini sila sa panudlanan sa kagamahanan.

Ang pagpahigayon sa drug test sa mga empleyado nasubay usab kini sa balaodnon o ordinansa sa siyudad hinungdan nga mopaubos gayud sila niini aron mahimong drug free usab ang ilang buhatan.

Si Reyes nagkanayon nga kong adunay magpositibo anaa na kini sa HR kong unsa ang proseso nga himuon batok sa maong empleyado.

Naglaom si Reyes nga walay magpositibo sa maong drug test nga gipahigayon sa maong mga empleyado.

Nasayran nga sa nilabay nga tuig adunay empleyado sa CTO nga nagpositibo sa drug test.

Samtang si Jonah John Rodriguez, pangulo sa COSAP nagkanayon nga padayon gihapon ang ilang trabaho sa pagpaubos sa drug test sa mga empleyado aron sa pagsiguro nga sila drug free sa ilang pagpanarbaho.

Matud ni Rodriguez nga dili lang mga empleyado ang ipaubos sa drug test apil usab ang mga barangay official.

Dugang ni Rodriguez nga sa nilabay nga adlaw gipaubos sa drug test ang 600 ka  sakop sa Cebu City Transportation Office diin gipaabot pa ang resulta niini. (BANAT NEWS)