Pagsaulog sa kalihukan sa pista sa birhen sa regla malinawon

CEBU, Philippines — Nahimong hapsay ang dagan sa mga sakyanan sa kadalanan sa siyudad sa Lapu-Lapu nonot sa pagsaulog sa piyesta sa Birhen sa Regla.

Una nini gisuspenso ni Lapu-Lapu City mayor Junard Ahong Chan ang klase sa mga tinun-an sa tanang level sa publikong tunghaan sa elementarya, High School ug kolehiyo.

Gihimo sa mayor ang pagluwat og executive order kabahin niini aron paglikay sa mga kahasol tungod kay gilauman ang pagdasok sa mga deboto sa Birhen sa Regla ug mga mamista.

Gisuspenso usab ni Mayor Chan ang trabaho sa mga buhatan sa kagamhanan gawas lamang sa mga frontline services nga naglakip sa buhatan sa City Treasurer's Office, City Health Office ug Office of the Building Officials OBO.

Nakatampo usab sa kahapsay sa dagan sa mga sakyanan tungod kay ang kagamhanan sa Lungsod sa Cordova misuspenso man usab sa ilang klase sa mga publiko ug pribadong tunghaan.

Sa iyang post sa social media si Cordova Mayor Cesar Suan mipasabot nga masinati ang kusog nga pagbunok sa ulan hinungdan sa pagsuspenso sa klase tungod kay dili siya buot nga marisgo ang kaluwasan ug panglawas sa mga tinun-an.

Samtang malinawon usab ang gihimong Garbo sa Lapu-Lapu Festival niadtong Domingo.

Napulo ka contingent ang misalmot sa kalihukan diin gisugdan kini sa street dancing ug gitapos sa showdown sa Hoops Dome sa Barangay Gun-ob.

Ang nahimong champion sa maong indigay karong tuiga mao ang Hugpong Mananayaw sa Kulturang Marigondohanon sa Distrito Singko sa Barangay Marigondon.

Giklaro usab sa kapolisan nga malinawon ang tibuok selebrasyon gawas lang sa kaso sa pagpamusil nga namatay gyud ang biktima.

Si Police Lieutenant Christian Torres, pangulo sa City Investigation Detection and Management Unit (CIDMU) ug tigpamaba sa Lapu-Lapu City Police Office (LCPO) miingon nga sa ilang imbestigasyon nasuta nga personal nga kasuko ngadto sa biktima ang hinungdan sa maong pagpamusil.

Dugang pa ni Torres nga gipaubos sa full alert status ang tibuok puwersa sa kapolisan sa LCPO nonot sa pagsaulog sa pista.  (BANAT NEWS)