Kapolisan, LGUs nangandam sa pagbunok sa uwan, baha ug landslides
CEBU, Philippines — Nangandam ang Cebu City Police Office sa Bagyong Kabayan pinaagi sa pakig-alayon sa Kagamhanan sa siyudad sa Sugbo ug pagtambong sa meeting nga gipatawag sa siyudad.
Sigon ni Police Lt. Col. Janette Rafter, Deputy City Director for Operations ug tigpamaba sa Cebu City Police Office nga duna sila’y trained personnel sa ilang Search and Rescue Teams.
Naka-standby ang ang SAR sa CCPO ug giandam na sab nila ang ilang mga ekipo nga magamit isip suporta sa Cebu City Disaster Risk Reduction and Management Office (CCDRRMO). Andam na sab ang ilang Quick Response Team kun pananglitan kinahanglan gyud ang ilang presensiya.
“Bawat istasyon nato naay mga QRT who can respond in case manginahanglan og security assistance or bisag unsang matang nga mahatag namo,” sigon ni Rafter. Hinuon sa labing uwahing update nahimo nalang kining low pressure area (LPA), apan sa gihapon, nasinati ang paguwan-uwan sa Metro Cebu kagahapon hangtud sa hapon.
Sa pagbanabana sa panahon sa PAGASA, ang Central Visayas, Eastern Visayas, ug Negros Occidental makasinati ug madag-umon nga kalangitan inubanan sa katag-katag nga pag-ulan ug pagpanugdog-kilat tungod sa Shearline. Ang nahabiling bahin sa Western Visayas, Palawan lakip ang Kalayaan Islands, ug Occidental Mindoro makasinati ug panagsang mapanganuron ngadto sa madag-umon nga kalangitan inubanan sa pat-ak pat-ak nga pag-ulan o pagpanugdog-kilat tungod sa Shear Line / Localized thunderstorms.
Kasarangan ngadto sa kusog nga hangin gikan sa Amihanang-Silangan ngadto sa Amihanan mopasulabi sa tibuok Visayas, Palawan lakip na ang Kalayaan Islands, ug Occidental Mindoro diin ang kadagatan kasarangan ngadto sa mabaluron.
Ang buhatan sa City Disaster Risk Reducion and Management Office (CDRRMO) sa Siyudad sa Mandaue mipatawag og tigom sa mga sakop sa Philippine Coast Guard, kapolisan sa Mandaue City Police Office (MCPO) Bureau of Fire Protection (BFP) ug uban pa aron kini pangandaman.
Si Alain Ybañez nga maoy pangulo sa CDRRMO sa maong dakbayan miingon nga apil sa ilang gipangandaman ang mga pagbaha ug mga pagdahili sa yuta nga sagad mahitabo panahon nga dunay pagulan-ulan, samot na kun dunay bagyo.
Matud pa ni Ybañez nga adunay mga dapit sa dakbayan nga bahaonon kaayo tungod kay lupa ilang lugar duna say mga dapit nga modahili ang yuta.
Hinuon sa nasayran sa ulahing taho sa Philippine Atmospheric Geophysical and Astronomical Services Administration (Pagasa) nga ang bagyong kabayan usa na lamang ka low-pressure area apan pa gihapon ang kahigyonan nga mahimo kining bagyo sulod sa 48 oras apan posible kini nga magdala og kusog nga uwan. — Romeo T. Limpangog, IBM (BANATNEWS)
- Latest