Pagdaginot sa bayranan sa kuryente sa siyudad giduso

CEBU, Philippines — Dili mominus sa tulo ka departments sa kagamhanan sa dakbayan sa Sugbo ang mipadayag og suporta sa gisugyot nga ordinansahon nga magtugot sa siyudad nga makadaginot og 20 porsyento sa bayranan niini sa koryente.

Ang gisugyot nga ordinansahon giulohan og "An ordinance instituting a Financial Arrangement Framework for the Solar Power Upgrade of Electrical Supply Facility in Buildings, Establishments, and Infrastructures owned by the Local Government of Cebu City", ug gipangamahanan ni Councilor Nestor Archival Sr.

Atol sa public hearing niadtong Miyerkules adunay tulo ka speakers nga mipadayag og suporta sa maong ordinansa nga nagtinguha sa pagsagop sa solar power.

Si Office of the Building Official (OBO) Engineer Fritz Ginayawan, miingon nga mosuporta sila sa maong ordinansa ug midugang nga andam sila sa pag-assist sa mga contractors nga nagtinguha sa pag apil sa bidding.

Nagkanayon usab si Engineer Jewel Biton gikan sa Department of General Services nga mosuporta sila niini tungod kay makaminus kini sa bayranan sa koryente sa siyudad.

Samtang si Department of Energy Visayas Field Office, Engr. Robert James Lacandaso ang mirekomendar nga ipasar ang maong ordinansa.

Gipasabot ni Archival nga ang electric bill sa city government sa tanan niining mga buildings dunay budget nga dili mominus sa P280 million sa usa ka tuig ug matag buwan ang dakbayan nagbayad og dili mominus P20 million.

"Now I made this ordinance in order to save the city government at least 20% percent or even up to 50% of the cost of the electricity bills in one month," suma ni Archival.

Gipasabot ni Archival nga ang ang pamaagi niini mao nga adunay contractor nga maoy mo-trabaho sa usa ka building nga gi-target nga makadaginot sa bayranan sa koryente pinaagi sa pagbutang og solar panel ug bayran kini sa gobyerno sa higayon nga ma-turn over na sa siyudad ang mga solar panels.

Usa sa mga contractors, ang GG Automations nga girepresentahan sa ilang Chief Operations nga si Augusto Jay-ar Reines, ang miatubang sa Cebu City council ug miingon nga uyon sila sa maong sugyot ni konsehal Archival.

Samtang si majority Floor Leader, Councilor Jocelyn Pesquera mipadayag og pagsupak sa maong ordinansa tungod kay matud pa niya nga makagasto gihapon ang siyudad tungod kay magbayad man kini og binuwan ngadto sa mga contractors. — /MEL (BANAT NEWS)