Konsehal sa lungsod gipatay

CEBU, Philippines — Laing elected official dinhi sa Central Visayas nasad ang gibanhigan ug napatay samtang nagkaduol ang umaabot nga Barangay and Sangguniang Kabataan Elections karong Oktobre 30,2023.

Kagahapong adlawa, gibanhigan sa riding in tandem ang kagawad sa lungsod sa Buenavista sa Probinsiya sa Bohol diha sa Barangay Cangawa National Highway, Barangay Cangawa sa maong lungsod.

Ang biktima giila nga si Danilo Añora, residente sa Dait Norte nga sakop sa naasoy nga lungsod. 

Sa imbestigasyon sa kapulisan, ang biktima sakay sa iyang XRM nga motorsiklopaingon na unta mopauli gikan buwangan sa ilang lungsod.

Gikatahong gisundan kini sa mga mamumuno nga luwan sab og motorsiklo ug pagabot sa maong dapit kalit kining gipaulanan og bala diha sa kalawasan hinungdan sa pagkatumba niini sa karsada.

Daling nangikyas ang mga mamumuno samtang gitabang ang biktima ug gidala sa Dagohoy Hospital apan gideklarar nga dead on arrival.

Ang Dait Norte sa Buenavista nabutang sa Election Area of Concern sa Comelec ug sa Police Regional Office tungod sa mga bayolenteng panghitabo kaniadto ug higpit nga panagribal sa mga magkaatbang.

Usa sa gisubay nga anggulo sa pagbanhig kaniya ang may kalabutan sa politika.

Si Añora maoy ikaduhang elected official nga gibanhigan ning semanaha, unang gipatay si Cansomoroy Barangay Councilor Anastacio Pacquiao sa lungsod sa Balamban.

Padung na mopauli si Pacquiao luwan og motorsiklo apan samtang nagsubay kini sa national highway sa Barangay Prenza gitaparan kini og riding in tandem ug gipusil sa ulo nga nakaingon sa iyang hinanaling kamatayon.

Nasuta gikan sa kapolisan nga si Pacquiao kandidato sa pagka barangay kapitan sa ilang barangay sa Cansomoroy.

Si Police Lt. Col. Glenn Hife, hepe sa kapolisan sa lungsod sa Balamban nga nahinabi sa GMA Super Radyo DYSS miingon nga nakuha sa CCTV footage ang pagpusil kang Pacquiao.

Matud pa niya nga naka full-faced helmet ang nagmaneho sa motorsiklo apan ang gunman nagkawo lang hinungdan nga nakita ang dagway niini ug dunay mga testigos nga nakaila kaniya.

Ang gisubay nga motibo sa krimen mao nga personal kay aduna kini nakabangi ang biktima pero gipugngan lang una kini ang detalye.

Hinuon wala sab nila giwagtang ang posibilidad ang politika ug uban nga anggulo. Nasayran sab nga aktibo kontra ilegal nga drugas si Pacquiao.

Ang tigpamaba sa Police Regional Office (PRO)-7 Lt. Col. Gerard Ace Pelare miingon nga ‘serious matter’ kini alang nila ilabi na nga elected officials ang mga biktima ug ang usa kandidato sab sa umaabot nga BSKE.

Hinungdan nga ikonsiderar sa kapulisan ang lungsod sa Balamban sa ilang security deployment.

Estoryahan pa kung ipaubos sa election watchlist area ang Balamban tungod kay ang basihanan kinahanglang politically motivated ang pagpatay.

“We can have witnesses, we have pieces of evidence nga magtudlo gyud if  this is politically motivated. But right now while usa na sa atong gitan-aw nga motibo dili pa nato i-close ang atong pultahan sa uban pang mga motibo kay aron dili ma mislead ang atong investigators on the ground kay basin og focus kay dihang dapita unya nisakay ra diay ang mga suspetsado sa iyang pagka kandidato,” pagklaro ni Pelare. — Gabriel C. Bonjoc  (BANAT NEWS)