Senior citizen nadakpan

CEBU, Philippines — Gipaslak sa karsel sa kapolisan ang usa ka senior citizen human siya nakuhaan og ilegal nga drugas diha sa usa ka subdivision sa Barangay San Roque, Dakbayan sa Talisay niadtong Miyerkules sa gabii.

Ang nasikop sa buy-bust operation nagpangidaron og 60 anyos ug ang iyang kustomer nga nag edad og 42 anyos. 

Ang operatiba sa kapolisan nihimo sa pagdakop human mitunol og drugas ang senior citizen sa ilang poseur buyer.

Si Police Lt. Col. Wayne Magbanua, hepe sa kapolisan sa Talisay nibutyag nga ang pangalan sa senior citizen maoy pirme nilang madunggan sa una nila nga gipangdakop.

Gihimo ang surveillance sud sa pipila ka buwan hangtud nga natigayon ang operasyon. Ang 42 anyos nga kustomer sa edaran nahibaw-an nga usa kini ka notadong tulisan ug nalambigit sab sa akyat bahay.

Nakuhaan kini og .9mm nga pistola nga adunay duha ka buhing bala.

Samtang ang senior citizen nakuhaan sab og shabu nga arunay gibana-bana nga balor nga P74,800. Sa pikas bahin, sakop sa bag-ong naila nga drug group sa Cebu City ang nasikop sa mga tinugyanan sa Philippine Drug Enforcement Agency Central Visayas uban sa CCPO Police ug NAVFORCEN sa buy-bust operation sa Sitio Sobusteha, Barangay Kalunasan, Cebu City.

Ang nasikop mao si Aldrin Rosaldo, 29anyo, construction worker, taga Barangay Sirao, bukiran nga bahin sa dakbayan ug nakuhaan kini og gituohang shabu nga mobalor og P204 mil, buy-bust money, cellphone, motor ug uban mga non-drug evidence.

Giingong maka dispatsar ang dinakpan 30 ngadto sa 50 gramos matag semana sa giingong ginadili nga drugas.

Sa Mandaue City, nadakpan sab sa City Drug Enforcement Unit (CDEU) ug nakuhaan og 50 gramong gituohang shabu nga mobalor og P340 mil ang us aka Jacob Manatad, 33.

Ang operasyon gihimo diha sa Barangay Looc, Siyudad sa Mandaue alas 10 pasado ang takna sa miaging Miyerkules sa gabii. Si Manatad kinsa taga Zone Ubi sa Barangay Paknaan  matud pang Police Major Romeo Caacoy Jr. usa ka semana nilang gipanid-an.

Ang dinakpan miingon nga gisugo lamang usab siya sa tawo nga dili niya kaila sa pagdala sa maong ilegal nga drugas sa maong lugar bugti sa P5 mil nga suho. — Rowena Capistrano, Romeo T. Limpangog (BANAT NEWS)