Boluntaryong pagguba sa The Freeman sa kural niini sa Pari-an Creek gihangop
CEBU, Philippines — Usa ka maayong ehemplo sa tanang mga establisamento ug mga nanagiya og mga estraktura kilid sa mga sapa sa Dakbayan sa Sugbu ang tagdumala sa Philstar Bldg. diha sa eskina sa D. Jakosalem ug V.Gullas Streets sa downtown area tungod sa boluntaryo niining pagguba sa kural niini kilid sa Pari-an Creek aron pagsunod sa three-meter easement zone.
Kini maoy mensahe ni Cebu City Rey Gealon sa management sa maong building nga maoy panimalay sa Star Group of Publications nga naglangkip sa Banat News, The Freeman Newspaper, Philippine Star, Pilipino Star Ngayon, PangMasa ug Business World.
Si General Manager Melandro Mendoza mimando sa pagpaguba kural niini aron mauli ngadto sa gobiyerno ang 3-meter easement zone subay sa balaod, ug aron mamentinar kini sa gobiyerno gikan sa mga bara nga basura nga nakaingon sa pagsaka sa tubig baha panahon sa tinguwan.
Matud pa ni Gealon nga nakita gyud kun unsa ka sensiro ang maong kompanya sa ilang kooperasyon sa kampanya sa lokal nga kagamhanan kontra baha.
"The Freeman is indeed fair and fearless. Fair in the sense that it acknowledges the rule of law in that it applies to all, despite being an institution whose building has been standing there way before the enactment of the Water Code, Building Code, or relevant laws on the matter. Fearless in the sense that it is without fear in the sense that it acknowledges the fact that the institution is not with the building but in the hearts of people who works there, most especially us who patronize the paper," tipik sa statement ni Gealon.
Nagmalaumon si Gealon nga ang gibuhat sa maong pamantalaan sundon usab sa ubang establisamento nga boluntaryong moguba sa ilang mga estraktura nga naa sa sulod sa 3-meter easement sa mga sapa.
Pipila ka mga personnel sa Cebu City Hall ang niabag sa gibuhat sa The Freeman sa pag-clear sa area. (BANAT NEWS)
- Latest