Sakop ni Teves napatay sa tracker team sa kapolisan

CEBU, Philippines — Patay ang Top 1 Most Wanted Person sa Central Visayas nga giingong sakop ni Negros Oriental Rep. Arnulfo Teves human matud pa misukol sa mga operatiba nga mi-serve sa iyang mga warrant of arrest sa Barangay Malabugas, Bayawan City, Probinsiya sa Negros Oriental niadtong adlaw’ng Huwebes, Hulyo 31, 2023.

Giila ang nakalas nga si Alex Mayagma, residente sa Barangay Minaba, Bayawan City sa naasoy nga probinisya.

Matud ni Police Lt. Col. Gerard Ace Pelare, tigpamaba sa Police Regional Office (PRO)-7 dunay pending warrant of arrests sa upat ka murder cases ug kalapasan niini sa Republic Act 10591 kun illegal possession of firearms ang suspek.

Gitutukan pag-ayo matud ni PRO-7 Regional Director Brigadier General Anthony Aberin ang pagdakop kang Mayagma kinsa matod pa nalambigit sa pagpamatay nga nahitabo sa Negros Oriental.

Pagka- Huwebes na-corner sa tracker team si Mayagma sa usa ka farm sa manok diha sa Barangay Malabugas.

Apan dihang giduol siya sa mga operatiba giingong gitionan niya og armas ang operatiba hinungdan nga nag-inilogay sila sa armas.

Nakuha sa kapulisan ang armas apan duna kini backup nga laing armas sa sling bag ug misuway na sab kini sa pagpusil sa mga operatiba hinungdan nga kini gipusil agi og panalipod sa mga polis.

Dunay impormasyon nga ang maong farm  giingong iya ni suspended Negros Oriental Congressman Arnolfo “Arnie” Teves.

“We have reports already but we are still validating kung it’s true nga nagamit pud in a previous killings si Alex Mayagma,” ni Pelare pa.

Lakip sab sa gisubay sa kapulisan kun si Mayagma kauban sa mga nagmasaker sa grupo ni anhing gobernador Roel Degamo ug siyam ka mga tawo sa Lungsod sa Pamplano sa nakalabay nga bulan sa Marso.

“Very elusive and he knows what to do, kabalo siya unsay gibuhat in fact this is a very intricate operation, I am not at liberty to tell you what we have done but it was a mixture of traditional and modern intelligence, applying the most sophisticated technology, that is why atong Regional Director was very happy and he is congratulating all involve units on this very intricate police operation,” ni Pelare pa.

Gipasalig sa PRO-7 sa katawhan sa Negros Oriental nga maghimo sila og dinagko nga operasyon aron mahatagan og hustisya ang mga krimen nga nahitabo sa probinsiya.

“This will send a strong signal sa mga katong mga nagpabilin pang nagplano nga maghimo og dautan sa Negros nga ang PRO-7 will always be watching you...This is an assurance sa mga tawo sa Negros Oriental nga ang gobyerno naglihok para mabalik ang peace and security situation sa Negros Oriental,” asoy ni Lt. Col. Pelare. IBM (BANATNEWS)