Gimolestiya sa maestro

CEBU, Philippines — Duha ka mga dalagitang tinun-an sa usa ka pampublikong tunghaan sa Carcar City ang midangop sa kapolisan ug mireklamo batok sa ilang magtutudlo sa subject nga math nga sila gipanghinol niini sa pribadong parte sa ilang mga lawas.

Ang 15 anyos grade 8 student mibutyag nga niadtong Hulyo 20, 2023 sa hapon gipatawag siya ilang maestro kay magpatabang siya sa iyang mga buhaton sa faculty room. Apan didto, gikumot matud pa sa maong 31-anyos nga magtutudlo ang iyang dughan ug giwalis ang iyang sayal ug gihikap ang iyang kinatawo dayong hunghong nga “ayaw og saba.”

Nakurat ang bata kay wala siya magdahom nga buhaton kadto sa iyang magtutudlo nga ilang gitahod.

Niadtong higayona nanawag ang asawa sa maong magtutudlo maong naputol ang kung unsa may plano niini sa biktima maong nakadagan ang naulahi pagawas sa lawak.

Pagabot sa ilaha gisumbong kini sa bata ngadto sa iyang amahan.

Apan ang suspetsado miadto sa ilang balay aron mohangyo nga dili na padak-on ang hitabo ug andam kini nga mobayad og dakong kantidad.

Apan nasuta nga duna sab diay laing tinun-an nga una ng nabiktima sa maong maestro. Nahitabo kini niadtong  Marso 30, 2023 ngadto sa 15 anyos gihapon nga dalagitang estudyante sa suspek nga gimolestiya sab. Ang bata wala siya magsaba sa iyang mga classmate tungod sa kahadlok nga pasakitan siya sa maestro.

Apan didto kini mitug-an sa maguwang nga babaye  nga siya nahilabtan  sa iyang magtutudlo sa math subject.

Tungod sa kahadlok nagduha-duha na ang duha ka estudyante nga mobalik sa ilang eskwelahan. Nahadlok sab silang i-bully sa ilang mga classmate tungod sa ilang gidangatan.

Apan ang Faculty President sa maong tunghaan mipasalig nga panalipdan nilang mga magtutudlo ang maong mga biktima. Mipasalig sab silang dunay imbestigasyong himuon batok sa maong magtutudlo ini og balik sa ilang prinsipal nga nitambong sa opisyal nga kalihokan sa DepEd didto sa kaulohan. Si Police Lieutenant Colonel Mark Gifter Sucalit ang hepe sa Carcar City Police station nagkanayon nga ila nang ipasaka ang duha ka kasong Acts of Lasciviousness in relation sa RA 7610 kun Child Abuse batok sa maestro.

"Regular filing ni siya, unya of course sa atoang pagpasa na sa complaints we will be forwarding this to DepEd Carcar City so that we don’t want na these incidents will be repeated again kay ang traumatic ni sa mga bata," sigon ni Sucalit.

Nagduda karon ang kapulisan nga aduna pay laing nabiktima ang maong magtutudlo nga wala pa motingog ug ilaha sila karong giawhag nga modangop kanila aron mapun-an pa ang kaso sa maong maestro. (BANAT NEWS)