Trak natagak sa pangpang, 2 patay

CEBU, Philippines — Patay ang drayber ug truckboy sa 10- wheeler truck nga natagak sa pangpang sa Lungsod sa Tabogon alas -12:30 Domingo sa kaadlawon Hulyo 30,2023.

Ang mga biktima giila nga sila si Dellot Casimero Arisgado (truck driver) hamtong ang panuigon ug residente sa Bataw, Bantayan samtang ang iyang pahinante mao si Ronald Caraballe Asoquen ,47,  residente sa Barangay Talisay sa Sta. Fe.

Ang Barangay kapitan nga  Nataniel Cortes sa Libjo, nangayo og tabang sa kapolisan kay adunay trak nga natagak sa pangpang sa ilang dapit.

Ang trak de karga nga dunay plaka nga YGY 884 nalimbuwad na sa ubos sa pangpang kauban ang drayber ug ang pahinante niini nga parehong nangapiit sa atubangang bahin sa maong sakyanan.

Matud pa dunay karga nga assorted goods ang maong trak nga padung sa Dakbayan sa Bogo.

Gikatahong nawad-an og kontrol sa lugsungon nga bahin sa kalsada ang drayber hinungdan nga napadung kini bakilid nga bahin sa karsada ug naigo ang usa ka balay sa ubos nga gipanag iya ni Editha Nacor, swerteng walay naigo sa tagbalay.

Naabtan og kapin 11 ka oras ang rescue operation sa mga sakop sa kapolisan,  Municipal Disaster Risk Reduction and Management Office sa lungsod sa Tabogon.

Duna pay laing Rescue Units sa kasikbit nga lugar ang nangabot aron motabang sa tinguhang masalbar pa ang duha ka sakay sa traka apan nakabsan gyud sila sa kinabuhi sa wala pa sila maugkat gikan sa pagkapiit.

Ang kapolisan sa Lungsod sa Tabogon padayon  ang gihimong imbestigasyon sa maong aksidente.— /IBM (BANAT NEWS)