Bayranan sa na-impound nga mga sakyanan giminusa

CEBU, Philippines —  Gihatagan karon sa kagamhanan sa siyudad sa Mandaue ang mga tag-iya sa na-impound nilang mga sakyanan nga makuha kini pinaagi sa gihatag nga amnestiya sa storage fee nga P1,000.00 nga sugdan sa pagpatuman sa Martes sa Agosto 1, 2023

Nunot usab kini sa giaprobahan na nga ordinansa nga gipangamahanan ni Konsehal Jimmy Lumapas, chairman sa Committee on Transportation sa konseho sa maong dakbayan.

Sugdan sa pagpatuman ang giaprobahan nga ordinansa nga matapos hangtud lamang sa Oktubre 31, 2023.

Gitumong ang paghatag og amnestiya aron pagdasig sa mga tag-iya sa na-impound nga mga sakyanan pagkuha niini ug aron makuhaan usab ang naghuot na nga impounding area sa traffic enforcement agency of Mandaue kun TEAM.     

Una niini sa wala pa mapalabang ang ordinansa nga paghatag og amnestiya, ang bayranan sa mga tag-iya sa na impound nga mga sakyanan mokabat sa P500.00 matag adlaw alang sa four-wheel vehicle ug P100.00 usab sa matag adlaw alang sa na impound nga motorsiklo.

Samtang sa maong gipatuman nga ordinanansa wala malakip sa gihatag nga amnestiya ang mga balayranan isip multa sa kalapasan sa balaud sa trapiko. (BANAT NEWS)