Dugang pagbansay sa mga social workers gitinguha sa DSWD

CEBU, Philippines —  Pagpalambo sa pagbansay sa mga social workers ug community assistants tutokan sa Department of Social Welfare and Development (DSWD) pinaagi sa pagbanhaw sa Social Welfare and Development Center for Asia and the Pacific (SWADCAP) nga gipangulohan ni DSWD Secretary Rex Gatchalian.

Ang SWADCAP usa ka gibag-o nga inisyatiba sa DSWD aron mahatagan ug espesyal nga pagbansay ug mga kalihokan sa pagpalig-on sa kapasidad sa mga social worker ug non-social nga mga trabahante.

Si DSWD Secretary Rex Gatchalian miingon nga ang pagpalagsik sa akademya nagtumong sa pagpalapad pa sa paghatag sa social protection sa nasud.

Dugang ni Gatchalian nga ang social welfare dili lamang bahin sa paghatag ug ayuda apan bahin usab sa pagpalapad sa sosyal nga proteksyon sa labing huyang nga mga sektor apan posible ra kini kun ang nasud adunay kapasidad sa igong mga social worker ug mga trabahante sa pagpalambo sa komunidad.

“We are reviving the development academy or this DSWD academy which is an existing facility that’s been around since 1959, and was envisioned to become a center of excellence in social work as well as community work,” matud ni Gatchalian.

Gitumbok usab sa secretary ang kakuwang sa mga social workers ug community development workers.

“Ang pagiging social worker ay laging last priority ng ating mga estudyante. So we are coming up with the DSWD Academy so we could capacity build social welfare assistants,” matud ni Gatchalian.

Pinaagi sa paglusad sa DSWD Academy malaumon si Secretary Gatchalian nga makakuha sila og daghang mga social worker.

Gihatagan usab ug gibug-aton sa DSWD Chief ang pagpahigayon sa mga non-social workers nga nagpraktis sa sosyal nga trabaho makatabang sa pagtukod sa nasud bahin sa pagpalapad sa proteksyon sa katilingban.

Ang proyekto gisuportahan usab ni Presidente Ferdinand Marcos Jr. kinsa, sumala ni Secretary Gatchalian, nagpahayag na sa pasalig sa paggahin ug pundo alang sa pagpaaktibo pag-usab sa SWADCAP. CNU Intern/MEL (BANAT NEWS)