Kapolisan mi-edukar bahin sa modus sa mga kawatan ug tulisan

CEBU, Philippines — Nagpadayon karon ang pagsuroy sa kapolisan sa Dakbayan sa Talisay ngadto sa nagkalain-laing kompaniya aron sa pagtudlo sa mga tag-iya ug empleyado sa ilang pagabuhaton nga malikay sa dautang elemento.

Si Police Lt. Col. Randy Caballes, hepe sa kapolisan nibutyag nga mas maayo nga makat-on ug masayod ang mga empleyado ug tag-iya sa kompaniya sa modus sa mga kawatan ug tulisan.

Gilakip ni Caballes sa pagrekomendar nga mas maayo gyud nga mogasto sila og CCTV camera kay dako kini og tabang sa dagan sa imbistigasyon kung aduna may krimen nga mahitabo.

Sama nalang adtong duha ka empleyado sa tindahan sa construction materials nga miunay sa pagkawat sa mga baligya.

Nakuha man tuod ang mga butang pero dali ra nilang nadakpan ang responsable sa krimen.

Sigon pa ni Caballes ang lihok sa mga kriminal maoy maayong tun-an aron di makahimo sa ilang modus. (BANAT NEWS)