Luna sa Kapitolyo nga gidonar sa UP hapit na mabawi
CEBU, Philippines — Gipaabot nga di madugay mabawi na sa Kapitolyo ang duha ka ektarya nga luna niini sa Brgy Busay sa dakbayan sa Sugbo nga gidonar sa Probinsya ngadto sa University of the Philippines Cebu.
Ang UP Cebu Chancellor Leo Malagar mipahibawo kang Gov. Gwen Garcia atol sa ilang tigum niadtong Hunyo 20, 2023 nga ang UP Board of Regents niaprobar na sa draft sa memorandum of agreement (MOA) nga mag cover sa mutual revocation sa deed of donation sa maong propedad aron nga mabalik kini sa Kapitolyo.
Gipaabot na lang nga hingpit mapirmahan ang maong dokumento sa UP President Atty. Angelo Jimenez.
Ang maong luna sa Busay gidonar sa Kapitolyo atol sa administrasyon ni kanhi gobernador ug karon bise gobernador Hilario Davide III ug giaprobahan sa provincial board niadtong 2016.
Ang luna magsilbi unta nga relocation site sa 530 ka indibidwal sa sitio Avocado nga nasunogan niadtong December 26, 2015.
Si Malagar nakigtagbo kang Garcia niadtong Marso aron ipadangat ang intensyon sa UP nga gamiton ang luna aron tokuron ang P65-million UP Cebu High School building apan dili nila mahimo tungod sa mga informal settlers nga nagpuyo sa luna.Si Garcia sa iyang bahin nagkanayon nga ang Probinsya sa Sugbo andam nga modevelop sa propedad sa Busay kon ang UP mouyon nga irevoke ang lot donation, butang nga gisuportahan sab ni Malagar.
Kon mapirmahan ang MOA sa duha ka habig, ang Busay property i-develop sa Kapitolyo aron magsilbi nga relocation site sa giila nga informal settlers sa UP Cebu. (BANAT NEWS)
- Latest
