Karsada nihulpa tungod sa nabuslot nga tubo sa tubig

CEBU, Philippines —  Nihulpa ang karsada paingon sa Sitio Cruzan, Bulacao ug Candulawan, Dakbayan sa Talisay kagahapon sa kaadlawon adlaw nga Martes tungod sa nabuslot nga linya sa tubig sa Metropolitan Cebu Water District sa ilawom sa maong sementadong karsada.

Si Jonathan Tumulak, pangu sa City of Talisay-Traffic Operation Development Authority (CT-TODA) nagkanayon nga niadtong Sabado nagsugod og trabaho ang MCWD sa pagpangita sa nabuslot nga tubo.

Ang MCWD nakadawat og reklamo gikan sa mga konsumidor nga nawad-an o hinay ang agas sa ilang tubig maong gipangita nila kun asa ang problema hangtud nga nakit-an ang leak diha sa kilid sa maong karsada.

Human nakakuha og permit sa siyudad ang MCWD, gisugdan dayon nila ang pagsubay sa linya diha sa kilid sa dalan, apan nasuta nga didto gyud diay sa mismong ilawom sa karsada ang nabuslot nga tubo.

Dihang ilaha kining gikawot gikan sa kilid nihulpa hinuon ang karsada hangtud nga di na kini maagian.

Si Mayor Gerald Anthony “Samsam” Gullas nga nisusi sa dapit nakigtigom sa taga MCWD ug sa taga Department of Public Works and Highways (DPWH).

Matud pa sa mayor nga naayo na ang tubo sa MCWD ug gani gitabonan na kini og balik og yuta. Moabot walo ka metros ang gilapdon ug gitas-on sa nahulpa nga karsada.

Nagpasalamat lang si Gullas nga nahitabo ang paghulpa sa karsada samtang gitrabaho sa MCWD sayo sa kaadlawon nga walay mga sakyanan o motorista nga nigamit sa dalan.

Ang mga residente nga naapektahan adto lang una moagi sa habig sa Bulacao sa Syudad sa Sugbo.—  IBM (BANATNEWS)