Senior citizen nga nakabotar usa ka higayon makadawat na og ayuda

CEBU, Philippines —  Ang senior citizen sa Lungsod sa Cordova nga nakabotar na sa makausa ka higayon  ang kwalipikado na kini nga modawat sa pinansiyal nga ayuda gikan sa kagamhanan sa maong lungsod.

Kini ang gipadayag ni Cordova Mayor Cesar “Didoy” Suan atol sa flag raising ceremony niadtong nilabay’ng Lunes.  Nasayran nga ang kagamhanan sa maong lungsod ang nigahin og P500 sa matag bulan ngadto sa mga senior citizen sa lungsod nga wala malakip sa listahan sa beneficiaries sa social pension nga gihatag gikan sa Department of Social Welfare and Development.

Nunot sa maong pamaagi iyang gipahbalo nga mo-qualify lang ang mga senior citizen sa pagdawat sa cash aid sa lungsod kon nakabotar na kini bisan sa makausa lang ka higayon sa eleksiyon.

Gipasabot ni Suan nga gihimo ang maong pamaagi sa pagsiguro nga kadto lang mga senior citizen sa lungsod ang makadawat ug sa paglikay usab sa mga naggikan sa laing lugar nga mobalhin tungod sa cash aid.

Gikataho nga ang mga senior citizen sa maong lungsod ang nakadawat og Christmas bonus niadtong Disyembre 8, 2022.

Si Suan maoy nag-apod-apod niini ngadto sa mga senior citizen diha sa 13 ka barangay sa lungsod.

Uban ni Suan niadtong higayona si Bise Mayor Victor “Boyet” Tago ug ang mga sakop sa konseho sa lungsod. - BDB (BANATNEWS)