Mga batan-on nga nag rumble pasakaan og kaso sa kapolisan

CEBU, Philippines — Pasakaan og kaso sa Cebu City Police Office ang grupo sa mga batan-on nga nag-rumble sa Uptown Mango Avenue, Barangay Kamputhaw, siyudad sa Sugbo kagahapon sa kadlawon, Mayo 29, 2023.

Una niini, duha ka grupo ang nag-rumble gumikan kay nasuko nga ang beer gibutang sa lamesa.

Ang grupo nila ni Junry Algarme Minor, 20 anyos, Kintwell Payusan Cartilla, 20 anyos ug Aldren Cala Sabal, 22 anyos nananghid sa grupo ni Brando Villacorta, 20 anyos nga mobutang kadali sa beer sa ilang lamesa.

Giingong misugot ang grupo ni Brando apan si Brando matud pa nasuko ug mihamag nga miresulta sa pagkatagak sa botelya sa beer ug nabuak ug didto gasugod ang rumble.

Girespondehan sa beat patrollers sa Abellana Police Station 2 ang maong insidente hinungdan nga nadakpan ang mga nahisgutan ug gidala sa police station.

Sa report sa Abellana Police Station 2 giingong nagkahusay ra ang duha ka grupo.

Apan si Police Colonel Ireneo Dalogdog, City Director sa CCPO miingon nga bisan og nagkahusay ang duha ka grupo pasakaan gihapon nila kini og kaso sama sa gibuhat nila sa mga tawo nga nalambigit sa rumble sa nanglabay nga mga buwan.   Suma ni Dalogdog nga andam na ang criminal complaint nga ipasaka batok sa maong mga batan-on, ug sila pasakaan og kasong alarm and scandal.

” Resulta sad siguro sa kuan(hubog) mao na giingon, mag-inom man gani dili gyud palabian dapat kanang moderate lang para ikaw naa gihapon kay control sa imong sarili”, suma pa ni Col. Dalogdog.

Gihimug-atan ni Col. Dalogdog nga mopasaka gyud sila og kaso aron dili kini sundon sa uban. (BANAT NEWS)