25 pa ka ilegal nga estraktura daplin sa Doña Pepang ang limpiyohan

CEBU, Philippines — Kapin sa usa ka buwan ang nahibilin gikan sa gitakdang deadline ni Mayor Michael Rama alang sa pag-convert  sa sementeryo sa Doña Pepang ngadto sa usa ka heritage park apan aduna gihapoy mga hagit nga kinahanglang trabahoon.

Adunay kinatibuk-ang 25 ka illegal structure sa daplin sa maong sementeryo nga gikinahanglan pa nga limpiyohan.

Sa sinugdan, adunay dul-an sa 40 ka residente sa nahisgutang lugar apan karon nikunhod kini ngadto sa 24.

Matud ni Ramil Ayuman, project overseer nga kini nga mga lumulupyo gisaaran ni kanhi Mayor Tomas Osmeña nga magpabilin diha sa maong lugar.

“From 37 to 24 structure owners, mao nay gipangsaaran sa kanhi mayor, Mayor Tommy Osmeña nga mupuyo diha. E re-block sila, but lahi na man ang management ron, unya bati man sad tan -awon kong masagol sila sa heritage park, masimang na ba sa gusto  sa Mayor(Mike Rama)”, padayag ni Ayuman sa usa ka programa sa  XFM.             Ang mga tag-iya sa maong mga estraktura nagpadala og sulat hangyo kang Rama nga paestaron sila duol sa Doña Pepang apan ang mayor lig-on na sa iyang desisyon.

Usa ka relocation site ang gigahin sa  24 ka structure owner diha sa Barangay Quiot, Dakbayan sa Sugbo.

Nanghinaot si Ayuman nga and Division for the Welfare of Urban Poor (DWUP) makahimo na og kasabotan uban sa nahibiling settlers karong semanaha.

Sa laing bahin, nasayran nga adunay usa ka patay’ng lawas nga gilubong sa niaging tuig diha sa Doña Pepang nga kinahanglang ibalhin.

“Gilubong March 2022, unya five years pa man na madugta. Among gipaabot ron ang legal opinion from the City Atty., tanang mga karaang bukog ibutang og usa ka lugar sa columbary”, butyag ni Ayuman. Laing problema mao ang pag-angkon sa usa ka pamilya nga ilahang gipanag-iya ang 30 square meters nga luna nga gigamit sa parking.

“Nangangkon og 30 square meters lang, gamay kaayo, ang purpose parkingan, they presented a deed of sale but among gitan-aw sa city assessor wala ma annotate, wala gyud sila, dili gyud to angay i- honor magpadayon ta”, ni ayuman pa.

Ang Program of Works and Estimate (POWE) alang sa maong proyekto anaa na apan kinahanglan pa nga aprobahan sa mayor diin human niini moagi pa kini sa proseso sa bidding. (Caecent No-ot Magsumbol/BDB) (BANAT NEWS)