Luna sa kapitolyo nga gigamit sa brgy capitol site bawion na

CEBU, Philippines — Gusto sa Probinsya sa Sugbo nga kuhaon na ang dili momenus pito ka mga garbage truck sa Barangay Capitol Site nga anaa sa 577 metro kwadrado nga luna sa Kapitolyo duol sa Fuente Osmeña circle.

Si Gobernador Gwendolyn Garcia nagkanayon nga ang Kapitolyo nagpadala na og sulat ngadto sa barangay usa ka tuig na ang nilabay aron ibalhin ang maong mga sakyanan ngadto sa luna sa dakbayan sa Sugbo sama sa motor pool ug storage facility sa South Road Properties.

Si Barangay Captain Manuel Guanzon sa Capitol Site misaad ngadto sa gobernador atol sa ilang tigum niadtong Mayo 4, 2023 nga ila kining himoon sa labing daling panahon.

Sa taho sa Capitol Information Office, si Guanzon nagkanayon nga kinahanglan nga maapil niini ang Commission on Audit (COA) sanglit nagplano sila nga i-auction ang pipila ka mga sakyanan nga dili na magamit.

Apan matud ni Garcia nga dili na kinahanglan pa nga maapil niini ang COA sanglit igo ra man ibalhin ang mga sakyanan sa laing storage facility ug dili ang pagdispose niini pinaagi sa competitive bidding.

Si Mark Jason Tirol, ang OIC sa COA Cebu Province auditing team niuyon ngadto sa gobernador ug niabiso kang Guanzon nga motuman na lang aron malikayan ang legal complications ilabina nga ang Kapitolyo maoy tag-iya sa luna kon asa nahimutang ang mga sakyanan.

Ang barangay ni parking sa ilang mga sakyanan sa nahisgutang luna sulod na sa dugay nga panahon human nga naapil kini sa land-swap deal tali sa Probinsya sa Sugbo ug sa Cebu City atol sa administrasyon ni kanhi gobernador ug bise gobernador Hilario Davide III.  Ang Kapitolyo nagplano nga idevelop ang maong luna nga duol sa usa ka mall ug tertiary hospital diha sa may Fuente Osmeña sa siyudad sa Sugbo. — MEL ( Banat News )