Negros Oriental tutokan sa PRO-7 karong Barangay ug SK Elections

CEBU, Philippines — Subsob na ang pagpangandam nga gihimo sa Police Regional Office (PRO)-7 alang sa Barangay ug Sangguniang Kabataan Elections karong buwan sa Oktubre, ug usa sa hatagan og atensyon ang Negros Oriental.

Si Police Lt. Col. Gerard Ace Pelare, tigpamaba ni PRO-7 Regional Director Brigadier General Anthony Aberin nga nagpahigayon na sila og initial assessment alang sa umaabot nga pinilay.

Matud ni Pelare nga nihimo sila og assessment sa threat level sa matag barangay ug mando gyud ni Brigadier General Aberin nga tan-awon gyud ang sitwasyon ilabi na diha sa Negros Oriental.

“Kami prepared na mi for that as early as now naa mi mga preparations kung mahitabo siya on time or delay or postpone whatsoever we will welcome it and we will be ready for it kay ang sitwasyon karon gud sa Negros Oriental dili lang tungod kay naay election it’s really very we are closely looking it,” sigon niPelare.

Gipasabot ni Pelare dunay resolusyon ang Commission on Election nga mag-categorize sa Election Watchlist Areas (EWAs) o hotspots sama sa red ug orange category.

Ang mga basihan niini mao ang intense political rivalry, duna bay previous related incidents ug presensiya sa threat groups.

Gilauman nga mabutang sa taas nga category ang Probinsiya sa Negros Oriental sanglit ang dapit dunay may presensiya sa threat groups sama sa Communist Terrorist Group (CTG).

“What I’m trying to say now is as early as now ang Police Regional Office-7 ga check na gyud ani, ga thoroughly check na gyud ani, tanang barangay,” ni Pelare pa.

Nag-back tracking sab ang PRO-7 sa tanang kaso nga nahitabo sa Negros Oriental dili lang tungod kay Barangay ug SK Elections apan mao gyud kini ang mando sa ilang labaw aron masuta kun kini may kalambigitan sa politika, CTG o personal grudge.

 “Our security preparation would always be of two parts, proactive and reactive but nag-focus ta sige sa proactive, sa proactive kanang threat assessment, ang karon ang tanang elected government officials sa region seven were already subjected to threat assessment naa na sila’y mga respective threat assessment, naa na tay na identify kung kinsa ang mga dapat tagaan og security, ato sang gi-assess kung ang ilang present security is really appropriate or sakto naba o kinahanglan ta modugang, ato ng gitan-aw as early as now in prepation sa Barangay Election”, ni Pelare pa. (BANAT NEWS)