Mga patigayon nga nisalmot sa Earth Day hatagan og insentibo
CEBU, Philippines — Giawhag karon sa Konseho sa Dakbayan sa Sugbo ang Cebu City Environment and Natural Resources Office (CCENRO) nga mangita og pamaagi nga mahatagan og insentibo ang pipila ka mga patigayon nga nihatag og partisipasyon sa kasaulogan sa Earth Day nga nahitabo sa niaging buwan.
Nigama og resolusyon si Konsehal Rey Gealon nga giaprobahan dayon sa konseho sa labing ulahi nga session.
Nitimbaya ang konsehal sa mga nisalmot sa maong kalihokan gumikan kay nagpakita kini sa tinud-anay nga pagpangga sa kalikopan.
Nagkanayon ang konsehal nga makiangayon lang nga protektahan ang kalibotan gikan sa hulga sa climate crisis busa importante kaayo nga manginlabot gyud ang katawhan.
Kahinumdoman nga niadtong Abril 22, 2023 gisaulog ang Earth Day nga giila nga labing dako nga "environmental movement "nga nag-link sa governments, institutions, patigayon, ug tanang katawhan sa kalibutan nga mohimo og maayong butang sa planetang gipuy-an niini.
" Earth Day is celebrated to remind all the citizens that there is only one Earth to live in, and that all stakeholders must do their part to take action against the climate crisis that everyone is facing right now," matud pa ni Gealon.
Isip paghatag og dugang dungog sa mga patigayon nga nisalmot makiangayon lang nga hatagan kini og insentibo.
Sa maong pamaagi, mas magkadaghan pa ang mosalmot sa sunod nga mga kasaulogan sa Earth Day. (BANAT NEWS)
- Latest
