215 ka mananagat nakadawat og hinabang; 1 milyong dental kits gihatag sa Naga

CEBU, Philippines —  Gitunol ni Mayor Jonas Cortes kagahapon sa buntag ngadto sa 215 ka mananagat sa Siyudad sa Mandaue ang P3 milyones isip pinansiyal nga ayuda sa lokal nga kagamhanan.

Si Cortes nipasabot nga nihatag siya sa maong kantidad ngadto sa mga mananagat tungod kay wala sila malakip sa paghatag og subsidy sa niaging tuig.

Si Renerio Cobong, presidente sa Fisherfolks Association sa maong siyudad maoy nangulo sa pagdawat sa nahisgutang pinansiyal nga ayuda.

Ang iyang bise presidente nga si Jimmy Baunsit ug uban pa nga opisyal ang nitambong usab sa maong kalihokan.

Sa laing bahin, nikabat ngadto sa 1 milyon ka toothbrush ug dental kits ang nahatag ngadto sa mga kabatan-onan sa Dakbayan sa Naga ubos sa programa nga “NagaSmile - Isang Milyong Sepilyo Program” sa siyudad.

Ang maong program gikan sa Department of Health nga gilusad niadto pang tuig 1994 diin tinguha niini ang pagpahingusog sa pagtudlo sa mga bata sa hustong oral hygiene hilabina sa mga anaa sa preschool.

Niadtong Pebrero 16, 2023 nakab-ot sa lokal nga kagamhanan ang paghatag og 1 milyon nga dental kits diin gawas sa dental kits nakadawat usab ang mga beneficiary og grocery pack, 10 ka kilo nga bugas, P1,000, tsinelas ug water container.

Ang bata nga nakadawat sa ika-1 milyon nga dental kit usa ka tinun-an sa kindergarten sa Cabuan Elementary School.

Ang Siyudad sa Naga nisagop sa maong programa niadtong tuig 1998 diin nitabang usab sa kalamposan sa maong programa ang nagkadaiyang pribadong kompaniya. — Le Phyllis F. Antojado, BDB (BANATNEWS)