Drug mule nagdala P120 milyones shabu

CEBU, Philippines — Nadakpan pinaagi sa hiniusang operasyon sa mga otoridad ang usa ka South African national nga suway mipalusot gikan sa abroad og gidudahang shabu diha sa Mactan Cebu International Airport kagahapong adlawa.

Ang mga sakop sa Philippine Drug Enforcement(PDEA)-7 Airport Interdiction Unit, Bureau of Immigration, Philippine National Police Aviation Security Enforcement Unit, National Bureau of Investigation, MCIAA-ESSD-APD ug ubang law enforcement agencies ang milusad sa maong operasyon batok sa suspek nga si Pietro Aliquo.

Matud pa nasakpan pinaagi sa x-ray ang kadudahang items nga gitaguan sa usa ka briefcase ug duha ka checked-in suitcases ni Aliquo nga gikan pa sa Johannesburg, South Africa via Doha, Qatar dayon sa Cebu.

Ang Narcotic Detection Dog (NDD) nga si “Bulik” sa PDEA-7, gipasimhot sa maong kadudahang mga maleta, milingkod kini, timaan nga dunay illegal drugs sa sud. Tungod niini, gipugngan dayon si Aliquo ug gipaablihan iyang mga bagahe.

Apan bisan gihabwa na ang tanan, bug-at gihapon mao nga gibalik kini og x-ray ug nasuta nga duna kini sekretong sudlanan nga pulido pagkasira.

Gilaslas kini sa mga ahente ug nasakpan ang dul-an 18 ka kilong gituohang shabu nga maayong pagkaputos og itom nga plastic bags.

Nasuta nga Cebu ang final destination niini kay naka-book na kini sa usa ka hotel hangtod sa Pebrero 8.

Ang PDEA-7 naghimo na karon og subsob nga imbestigasyon aron pagtumbok kun kinsay kontak sa suspek dinhi.

African drug syndicate

Ang director sa PDEA-7 nga si Jigger Montallana miingon nga ang nakuhang shabu gikan sa suspek mokantidad og P120 milyones.

“Isipin mo ‘yung 1,000 plus na affected barangays so daghan na sad manuyop didto. Biruin mo ‘yung 17 kilos na ‘yan tag-iilang point something andaming mabuang na sad,” sigon ni Montallana.

Gibutyag ni Montallana nga nabantayan ang suspek human ang anti-narcotics authorities sa abroad maoy mihatag og tip sa Bureau of Customs ug sa National Bureau of Investigation bahin ni Aliquo.

Si Montallana miingon nga tighatud lang si Aliquo. Ang parehas ni Aliquo gitawag nga ‘drug mule’ diin bayran lang kini kun makalusot.

Matud ni Montallana, estilo kini sa African Drug Syndicate. Gisusi karon kun nag-operate na ang maong sindikato dinhi sa Central Visayas ug kun unsa na sila kadugay dinhi.

Mga barko

“Ang ini-envision natin sa Central Visayas particular yung Cebu Province yung ating creation ng One Cebu Inter-Agency Interdiction Task Force para we have to extend out fight outside the borders, kumbaga doon pa lang sa borders natin let’s hit na yung supply para dili nata maglisod pag nakasulod na. Daghan na kaayo ta og problema pag nakasulod na so it’s one of the effort that we are very supportive right now na ma established natin ‘yung interdiction task force,” dugang ni Montallana.

Si Gobernador Gwendolyn Garcia gikatakdang moluwat og executive order nga estriktuhon na tanang mosulod nga mga barko ug sakyang pangdagat nga modunggo sa mga pantalan sa probinsya.

Kini human niya nasayran gikan sa nagkadaiyang ahensya nga membro sa One Cebu Inte-Agency Interdiction Task Forice (OCIATF) nga adunay mga barkong modunggo sa Sugbo nga walay mga papeles sama sa Notice of Arrival nga usa ka dokumento kinahanglan sa ipakita sa vessel agent ngadto sa Office of the Harbor Master.

Atol sa tigom ni Garcia sa task force nga gilangkuban sa PNP; PDEA; Philippine Coast Guard (PCG); Naval Forces Central (NAVFORCEN); Maritime Industry Authority (MARINA); Cebu Port Authority (CPA); ug  Bureaus of Customs, Bureau of Immigration and Quarantine (BIQ), nasayran sa gobernadora nga adunay mga kadudahang mga barko mamalong sa ilang automatic identification systems (AIS) transponders (AIS).

Ang AIS, usa ka maritime requirement sa tanang barko aron masayran ang position ug identification lakip ang ubang impormasyon sa usa ka barko nga mosulod sa usa ka coastal area.

Apan si Commodore Luisito Sibayan ang commander sa Coast Guard District Central Visayas nga bisan pa og palungon ang transponders, adunay gihapon mechanisms ang ahensya pagsuta sa lokasyon sa barko.

Si Garcia nagkanayon nga ang iyang EO paluyohan kini og provincial ordinance nga ipasar sa provincial board.

Si Lapu-Lapu City Mayor Junard Chan midayeg sa task force sa malampusong pagkasikop ni Aliquo.— Le Phyllis Antojado, Rowena D. Capistrano (BANATNEWS)