88 ka sakop sa Lapu-Lapu Police gipaubos sa drug test
CEBU, Philippines — Gipaubos sa random drug test ang 88 ka sakop sa Lapu-Lapu City Police Office (LCP0) niadtong Miyerkules Enero 18, 2023 Si Police Colonel Elmer Lim, direktor sa kapolisan sa LCPO miingon nga ang random drug test pagahimoon matag semana isip kabahin sa internal cleansing program sa kapolisan.
Ang magpositibo ipaubos pa kini sa confirmatory test sa pagsiguro sa sunod lakang nga himoon nga naglakip ang pagtangtang sa serbisyo.
Suma pa ni Lim nga karong tuiga ilang gisugdan ang programa sa bulan sa Enero ug gilauman nga mahingpit ang pagpatuman niini sa bulan sa Disyembre niining tuiga.
Sa laing bahin gipaubos og training ang kanhi mga drug surrenderees sa Lapu-Lapu City Police Office (LCPO) sa tinguha nga hingpit na silang magbag-o sa kinabuhi.
Sila gitawag na karon sa kapolisan og mga Anti- Drug Advocate pinaagi sa pagtudlo kanila sa pag-marcha, pagsaludo ug uban pa.
Migradwar na kini sila sa unom ka bulan nga rehabitation nga gipasiugdahan sa CLOSAP ug ilang gipadayon ang maong drug rehabilitation sa tuyo nga dili na kini mahibalik sa ilang bisyo.
Samtang sa gihimong buy bust operation sa kapolisan sa Liloan nasakmit ang gituhuang shabu nga mokabat sa 110 gramo nga gibana-bana nga mobalor og P748, 000.
Si Police Major Ramil Morpos, hepe sa Liloan Police Station miila sa nadakpan nga mao si Joel Dimacilid, 51 anyos drayber sa usa ka pribadong establisamento ug nagpuyo sa Barangay Jubay sa maong lungsod.
Si Dimacilid giingong makabaligya og usa ka kilo nga shabu matag semana ug giisip nga High Value Individual (HVI).
Nadakpan usab sa kapolisan sa Presinto 3 sa Mandaue City Police Office (MCP0) ang pusher og shabu sa Barangay Paknaan sa maong dakbayan.
Ang dinakpan giila nga si Joseph Galleon, 25 anyos nga molopyo sa Barangay Umapad sa Siyudad sa Mandaue ug nakuha gikan kaniya ang 2 gramo nga shabu nga nagkantidad og P13,000. (BANATNEWS)
- Latest