DPWH ug kontraktor sa UN road project gitambagan ni Garcia

CEBU, Philippines —  Wala usa gipatuman ni Gobernador Gwwendolyn Garcia ang memorandum of agreement nga gipirmahan niya uban sa mga opisyal sa Department of Public Works and Highways (DPWH) alang sa pag-aspalto sa Probinsya sa dalan sa may U.N. Avenue sa syudad sa Manduae.

Kini human nasayran sa gobernadora nga dunay panagabangi ang DPWH ug sa kontraktor sa maong proyekto. Mao kini ang giingong rason kun nganong nalangay ang pagtapos sa maong road project nga nakahasol na sa mga motorista nga moagi sa maong dapit.

Niabot pa sa korte ang issue human nga gisuspenso sa DPWH ang pagtrabaho sa kontraktor sa maong proyekto. Ang bangi niabot na og tulo ka tuig karon. Niadtong Nobiyembre 14, si Garcia nisulod ni og kasabotan tali sa DPWH aron ang Kapitolyo na ang moaspalto sa dapit isip ‘remedial measure’ hilabi na nga daghan na ang nangreklamo kay hasol kaayo ang maong dalan agian.

Apan atol sa meeting niadtong higayon, nasayran sa gobernador nga ang ang pag-terminate sa kontrata dili tungod kay “incompetent” ang kontraktor.  Sa report sa Capitol Information Office, ang contractor adunay positive 35 performance rating.

Tungod niini si Garcia niawhag sa duha ka habig nga hiloton ang ilang panagsungi hilabina nga nag apektado niini mao ang publiko.  “I am asking for you to reach an agreement. Sit down because this is not a matter of trying to prove who has the better lawyer. Peoples’ lives and livelihoods are involved here and getting directly affected,” matud ni Garcia sa maong report.