Mga kawani sa MOD i-deputize sa CCTO idestino diha sa Carbon Market

CEBU, Philippines — Ang hepe sa Cebu City Transportation Office (CCTO) Paul Gotiong nibutyag nga mo deputize sila sa pipila ka mga empleyado sa Market Operations Division (MOD) aron manakop sa mga badlongong motorista diha sa Carbon Public Market.

Isip kabahin sa modernisasyon sa maong merkado gipaniguro sa kagamhanan sa siyudad nga mapatuman ang hapsay nga dagan sa trapiko diha sa maong dapit.

Moabot sa 30 ngadto sa 40 ka empleyado sa MOD ang hatagan og gahom nga makasita sa violators.

Pinaagi niini, sigurado nga ma-monitor ang kadalanan diha sa palibot o sulod sa merkado.

Ang nahisgutang mga empleyado ipaubos kini sa mga pagbansay-bansay ug gikatakda nga sa unang bahin sa buwan sa Oktubre niining tuiga ang graduation niini.

“Dako gyud kini og tabang, aron masiguro gyud nato nga mapatuman ang mga lagda sa trapiko sa atong merkado”, matud ni Gotiong.

Matud usab ni Gotiong nga ipaubos usab sa eksaminasyon ang maong mga kawani diin nagpakita kini nga andam sila sa operasyon.

Gihangyo ni Gotiong ang mga motorista kinsa moagi diha sa merkado nga motuman  gyud kini sa mga lagda aron mahimong hapsay ang area ug  tulin usab ang pagpangompra sa mga tawo.

Ang mga motorista kinahanglan nga adto kini mo-park sa gitagana nga lugar.

Usa usab sa ilang gikampaniya karon mao ang paghawan sa mga butang nga nakababag sa agianan sa tawo.

Giingong tungod sa mga butang nga nagbabag sa mga agianan mapugos ang ubang tawo nga moagi sa karsada nga alang sa mga sakyanan diin nakahatag kini og problema sa trapiko. BDB (BANATNEWS)