DTI mopahigayong og balik-eskwela diskwento caravan

CEBU, Philippines — Gipahibawo ni Dinah Gladys Oro, senior trade and industry specialist sa Department of Trade and Industry(DTI)-7 nga karong Agosto 14, 2022 aduna sila’y balik-eskwela edition nga diskwento caravan diha sa Mantalungon, Lungsod sa Dalaguete.

Adunay 16 ka retailers ang apil sa maong kalihokan diin dili lang school supplies ang ibaligya nila lakip na mga gamit sa kusina, tambal, feeds, fertilizers, canned goods ug uban pang panginahanglanon sa mga tawo.

Tibuok adlaw sa Agosto 14, 2022 magpundo ang DTI-7 diha sa Mantalungon, Lungsod sa Dalaguete ug nagpasalamat sila sa lokal nga kagamhanan sa lungsod sa suporta niini sa pagpahigayon sa diskwento caravan.

Matud ni Oro nga dili lang mga residente sa Mantalungon ang makabenipisyo niini apan apil ang mga silingan nga mga lugar.

Moabot sa 15 porsyento ang diskwento nga ihatag sa retailers, manufacturers ug distributors nga moapil sa diskwento caravan ug lain usab ang makuhang benipisyo sa mga residente diin dili na kinahanglang molugsong sa siyudad.

Sa pagkakaron naghuwat pa sila og official memorandum gikan sa ilahang ulohang buhatan kon ang subayan ba nila nga suggested retail price sa school supplies kadtong sa 2019 ba gihapon o dili.

Nasayran nga sa pagkakaron wala pay latest suggested retail price alang sa school supplies.

Hangyo sa DTI-7 sa manufacturers, distributors ug retailers nga tan-awon ang ilang pricing kon ma-afford ba kini sa katawhan ilabi na sa mga lagyong lugar.

Sa laing bahin,  si Paul Gotiong, pangulo sa Cebu City Transportation Office nagkanayon nga nag-monitor na sila sa mga tunghaan sa siyudad karon nga nagkaduol na ang pagbukas sa klase sa Agosto 22, 2022.

Matud ni Gotiong nga nagpahigayon usab sila og clearing operations diha sa pampublikong tunghaan.

Ang CCTO sa pagkakaron dunay striker team nga maoy moresponde kon dunay mga panghitabo ug i-deploy usab sila diha sa mga dagkong tunghaan ilabi na sa pagsulod ug pagawas sa mga estudyante.

Gipahibawo ni Gotiong nga gibalik na nila ang signages ug niawhag sa tawo nga kon makakita og signage ilabi na “no parking” dili gyud mo-park aron dili maisyuhan og citation ticket o ma-clamp ang sakyanan. —BDB (BANATNEWS)