Matag andana sa City Hall pabutangan og comment box
CEBU, Philippines — Pabutangan ni Mayor Michael Rama og comment box matag andana ang Cebu City Hall diin dinhi ipadayag sa katawhan ang ilang masulti sa ilang mga kasinitian sa serbisyo sa nagkadaiya nga mga departamento sa city hall.
Gitahasan ni Rama ang City Human Resource Development Office nga maoy moumol sa iniSusiyatibo niini.
Matud ni Rama nga siya mismo ang mangunay sa pag-review sa mga unod sa comment box diin matag semana niya kining i-review. Kinahanglan usab nga transparent ang matag box.
Si Rama nagkanayon nga isip kanhi HR practitioner importante alang kaniya ang pag-abi-abi sa mga tawo nga mosulod sa tagsa-tagsa ka buhatan.
Sayo pa, gipadayag ni Rama nga dili magsalig ang mga trabahante kalabot sa pagpabilin nila diha sa City Hall tungod kay ipaubos gihapon og evaluation ang ilang mga performance matag tulo ngadto sa unom ka buwan.
Ug kong magtinapolan kini sa ilang trabaho siguradong taktakon kini ubos sa hustong proseso.
Sa nilabay’ng mga adlaw, giklaro ni Rama nga kinahanglan nga ang mga empleyado nagtrabaho kini base sa ilang mga tahas ug kinahanglan nga wala nay mga empleyado sa city hall nga makita lang panahon sa tingkubra sa sweldo.
Nasayran nga niabot ngadto sa 500 ka job order ug casual nga mga empleyado sa city hall ang wala na ma-renew atol sa pagsugod sa bag-ong termino ni Rama sa nilabay’ng Hulyo 1. BDB (BANATNEWS)
- Latest
