Sinas motabang sa peace and order sa Cebu City
CEBU, Philippines — Pormal nga gianunsyo kagahapon ni Mayor Michael Rama pagkahuman sa flag-raising ceremony diha sa Cebu City Hall nga usa sa motabang sa iyang administrasyon mao si retired Police General Debold Sinas.
Mao kini ang magsilbi nga adviser sa Cebu City Peace and Order Council . Si Sinas nakasilbi kaniadto isip Police Regional Office-7 director ug hepe sa Philippine National Police.
Matud pa ni Rama nga nakita niya ang kapabilidad ni Sinas busa dako gyud ang iyang pagsalig niini alang sa paghatag og inputs sa pagpatuman sa kahapsay ug kalinaw sa siyudad.
Una nga gibutyag sa mayor nga mga dekalibre gyud nga mga personalidad ang motabang sa pagdumala niya sa siyudad.
Nitambong usab si Sinas sa Flag Raising ceremony ug miingon nga ang dakong gugma niya sa Sugbo maoy rason nga wala siya nagduha-duha sa pagdawat sa tahas sa mayor.
“So panahon na nga kinahanglan itaas na pud nato ang atoang status. Ako, I would really like to serve Cebu, kay bisa’g naa pa ko diri, kung nakahinumdom mo, ako ang regional director, up to nag-Chief PNP ko, pabalik-balik ko diri sa Cebu because sa potential ug kagwapo sa lugar,” nagkanayon si Sinas.
Makig-alayon usab siya sa mga kaila niya sa Bureau of Fire Protection ug Bureau of Jail Management and Penology.
Gusto usab Sinas nga mahinabi ang mga barangay tanod kun diin iyang ipaambit ang iyang mga ideya alang sa pagmentinar sa kahapsay ug kalinaw sa usa ka lugar.— IBM (BANATNEWS)
- Latest
