BBM -Sara nakakuha og sobra 1M nga botos sa Probinsiya sa Sugbo

CEBU, Philippines — Sobra 1milyon ang nakuha nga boto sa tandem ni kanhi senador Ferdinand “Bongbong” Marcos Jr. ug Davao City Mayor Sara Duterte -Carpio sa presidential ug vice presidential race.  Base sa final and official tally sa boto sa Provincial Board of Canvassers si Marcos nakakuha og 1,055,985 nga botos samtang si Duterte-Carpio nakakuha 1,258,538 botos.

Samtang si Vice President Leni Robredo nakakuha lang kini og 391,080 botos gisundan ni Senador Manny Pacquiao nga adunay 371,183 botos.

Sa bise presidente nagsunod kang Duterte-Carpio si Tito Sotto nga adunay 247, 093 botos ug Kiko Pangilinan nga nakakuha og 235, 010 botos.

Si Marcos ug Duterte-Carpio parehong giendorso sa One Cebu.  Si Gobernador Gwendolyn Garcia, chairman sa One Cebu nagkanayon nga usa kini ka katumanan sa iyang saad sa BBM-Sara UniTeam.  Nasayod si Garcia nga dili tanan nakauyon sa resulta sa eleksiyon diin sobra sa 30 milyones ang na-record karon.

“For those who cannot accept it, it’s your choice. Kami naman we hope,  we continue to hope but we belong to the many Filipinos kayo the elitist few at educated whoever you are, if you do not feel that you can connect with us it's your choice”, tipik sa pamahayag ni Garcia.

Nunot niini, gipasigarbo sa Partido BARUG -PDP Laban nga natuman nila ang ilang gisaad nga makahatag og dakong boto kang Marcos ug Duterte-Carpio. Sa Dakbayan sa Sugbo nakakuha si Marcos og 344,867 botos samtang si Duterte-Carpio nakakuha og 382,498 botos.

Si Robredo nakakuha og 160,890 botos gisundan ni Senador Manny Pacquiao nga adunay 50,145 botos.

Samtang ang kaatbang ni Duterte-Carpio alang sa pagka-bise presidente  nga si  Senate President Vicente Sotto III nakakuha kini og 100,883 botos sa Siyudad sa Sugbo diin gisundan kini ni Senador Francisco Pangilinan nga adunay 84,284 botos.

Gibutyag sa pangulo sa Partido BARUG nga si Mayor Michael Rama nga ang maong resulta mopasamot sa lig-on nga koneksiyon sa siyudad ngadto sa nasudnong kagamhanan alang sa pagkab-ot og daghang programa sa katawhan.

Mayoriya sa mga sakop sa Partido BARUG ang nakadaog sa piniliay niadtong Lunes. —Sanden J. Anadia/BDB (BANATNEWS)