CCDRRMC nangandam na sa kalihukan sa Semana Santa

CEBU, Philippines — Ang pangulo sa Cebu City Disaster Risk Reduction and Management Council Atty. Gerry Carillo mibutyag nga sunod semana naka red alert na sila ug dili na tugutan ang mga personnel nga maka file of leave.

Kini aron duna gyuy makatubag sa mga emerhensiya nga mahitabo ilabi na kay daghang kalihukan nga mahitabo dinhi sa siyudad.

Samtang si Cebu City Councilor Joel Garganera, pangulo sa Emergency Operations Center Cebu City nagpahigayon og ocular inspection sa mga pantalan. 

Kuyog sa Konsehal ang Cebu Port Authority Pier 3 Manager Bernard Macuto.

Segun sa post ni Garganera sa facebook page niini iyang gipahibawo nga adunay composite team sa PNP, PDEA, Maritime aron mo augment sa Port Police nonot sa gipaabot nga pagdaghan sa mga pasahero.

Bisan pa sa paglugak na sa alert level suma pa sa konsehal nga dili gihapon angay mokompiyansa ug motuman gihapon sa Basic Health Protocols.

Sa laing bahin gipahibawo na sa mga simbahan sa Archdiocese of Cebu ang mga kalihukan sa Semana Santa.

Apil na niini ang bendita sa lukay karong Domingo nga pangulohan ni Archbishop Jose Palma.

Lunes Santo hangtud sa Biernes Santo adunay pagkompisal gikan sa alas dies sa buntag ngadto sa alas dose sa udto ug ala una ngadto sa alas tres sa hapon.

Himoon usab ang mga prosesyon sa Martes Santo ug Biernes Santo nga motuyok sa pipila ka mga kadalanan.

Ipahigayon ang Easter Vigil Mass uban sa Arsobispo sa Black Saturday alas otso sa gabii, ug alas tres sa kadlawon ang sugat procession ug alas kwatro sa kadlawon ang Easter Sunday mass.

Samtang himoon usab ang pagsira sa pipila ka karsada sa lungsod sa Minglanilla sunod semana. Kini maoy gipahibawo sa Minglanilla Police ug sa Minglanilla Traffic Commission (MITCOM).

Ang pagsira himoon nonot sa pagpahigayon og procession o kalihukan sa simbahan. Rowena D. Capistrano, Gabriel C. Bonjoc/MEL (BANATNEWS)