Seguridad sa pantalan gihugtan
CEBU, Philippines — Gitutokan na sab karon sa kapolisan ang higpit nga pagbantay sa mga pantalan sa Cebu City human nga nagsugod na og pagpangabot ug pagpanglarga ngadto sa ubang mga probinsya ang mga tawo gumikan sa pag-obserbar sa Kalag-Kalag.
Matud ni Police Captain Edgar Labe, Waterfront Police Station kansang hurisdiksyon nasakop ang tulo ka pantalanan nga dunggoanan sa mga barkong pasaheroan sa Cebu City, gipamutangan na nila og dugang mga polis.
“Manageable raman, medyo ni increase (passengers) pero sa early morning ang mas daghan, ni-increase siya kay of course kalag kalag, vacation, visit sa pamilya,”matud ni Labe.
Matud niya magpabilin ang maong mga polis nga bantayan ang mga pantalan hangtud sa sunod semana sa pagbalik sa mga bakasyonista.
Samtang si Port Police Inspector Jose Jupiter Orzales sa Cebu Port Authority (CPA) miingon nga kasagaran modagsa ang mga pasahero alas-6 sa buntag kay mao kini ang oras nga pasakyon na sa mga barko padung sa Tagbilaran City, Camotes ug Ormoc City ang mga pasahero.
“So mao gyud na nga time nga mga passengers, magdungan, magdasok, so kami pud diri, as per mandate sa amoa amo pud gi implement ang health protocols, like social distancing, wearing of facemask, mao ng kami magtuyok-tuyok sad mi diri,” matud pang Ozales.
Sugod kagahapong adlawa namatikdan ang pagdagsa sa daghang mga pasahero ug alas-10 na sa buntag kini nilurang.
Apan bisan pa sa pagdagsa sa mga pasahero hapsay ra kanunay ang pagpasakay sa mga pasahero.
Daan na nilang gipangandaman ang pagdagsa sa mga pasahero tungod sa Kalag-kalag kay mao kini ang mga panahon nga daghang biyahidor ug bakasyonista.
Gipaab sab nilang daan nga mao sab kini ang mahitabo unya sa taliabot nga Pasko.
“So most probably manguli jud ng mga tawo, especially given sa situation nga ang travel process nato is almost going back to normal kay na less na ang restrictions sa mga travel destination, so expect nalang gyud ta nga daghang passengers nga modagsa sa pantalan,” ni Ozales pa. –IBM (BANATNEWS)
- Latest
