Kisaw sa politika nagsugod na sa Minglanilla

CEBU, Philippines — Dako ang pagtuo ni Mayor Elanito Peña sa lungsod sa Minglanilla nga personal nga interes ang nagtukmod sa duha ka grupo nga makig-atbang nila sa sunod tuig nga piniliay. Iyang giangkon nga daghan nga proyekto ang ilang nahimo ug kini nakita sa mga buot moatbang kanila nga maoy higayon nga ilang pahimuslan.

Si Peña mao ang mag bise mayor ni Atty. Rajiv Enad samtang sila atbangan ni Jigger Cañedo uban ni kanhi bise mayor Jojo Selma ug ni bise mayor Luben Geonson uban ni Marlo Cañada.

Three cornered fight ang atangan sa lungsod sa Minglanilla sa sunod tuig nga eleksyon.

Gihulagway ni Peña nga kaning duha ka grupo nga moatbang nila nagkumboya aron ang ilang administrasyon dauton kay lagi aduna kini giapas.

“Nakita man nila ang mga proyekto nato kini sila mao ni gitawag nga “dawlim” kana bang “dawat limpyo”, sigon pa ni Peña.

Nalipay lang siya nga si mayor Gerald Anthony “Samsam” Gullas nga maoy giila nga lider sa Partidong Alayon nihatag og suporta kanila bisan pa man og paryenti ni Gullas ang mga Selma.

Masaligon sila sa word of honor ni Gullas nga maoy ilang gikuptan nga alas sa ilang pagdagan sa sunod tuig nga pinilay. Apan si Cañedo nitataw nga ang tinguha nga maserbisyohan ang taga Minglanilla maoy naa sa iyang huna-huna.

Siya nagkanayon nga dako ang iyang sakripisyo sa iyang plano tungod kay maayo ra ang dagan sa iyang panarbaho sa pribadong kompaniya.

“Dako ni akong sakripisyo. Not until now too much noise from the government, Minglanilla needs a good manager,” segun pa ni Cañedo. —MEL (BANATNEWS)