Pinuy-anan alang sa ma-rescue nga kabataan planong tukoron sa siyudad
CEBU, Philippines — Tinguha karon sa Kagamhanan sa Siyudad sa Sugbo nga mopahimutang og halfway house diha duol sa NOAH Complex sa South Road Properties (SRP) alang sa mga ma- rescue nga mga bata diha sa kadalanan.
Matud pa ni Konsehal Donaldo Hontiveros nga gisugdan na nila ang diskusyon niini.
Gitug-an sa konsehal nga pipila sa mga na-rescue nila nga mga bata gikan sa laing LGU.
Base usab sa ilang ebalwasyon, inighuman og hatud sa mga bata sa tinud-anay nila nga pinuy-anan, kay mamalik gihapon kini og puyo sa kadalanan.
Mao kini nga rason nga moumol sila og dugang mga programa aron matuldokan na ang maong problema. Ang maong programa mahimong kabahin sa plano ni Bise Mayor Michael Rama nga mag-umol og NOAH 2 diha sa SRP.
Samtang nagpadayon pa ang diskusyon kalabot sa gitingoha nga halfway house , nagplano karon si Rama nga mohangyo kang Dr. Rhea Mar Angtud, ang DepEd-Cebu City Division superintendent, aron gamiton ang pipila ka class room sa mapili nga tunghaan isip temporaryo nga istaran sa mga ma- rescue nga mga bata.
Nasayran nga sa pagkakaron ang na-rescue nga mga minor adto dalhon sa San Roque Gym ug suma pa ni Rama nga dili haum ang maong dapit nga butangan sa mga bata. —MEL (BANATNEWS)
- Latest