CT-TODA nadugangan og 20 ka bag-ong sakop

CEBU, Philippines — Nadungagan ang pwersa sa City of Talisay-Traffic Operation Development Authority (CT-TODA).

Kini human 20 ka indibidwal ang bag-o lang migradwar sa usa ka semana nga training aron mahimong traffic enforcer.

Ang mga bag-ong nadawat nipaubos sa daghang eksaminasyon dili lang sa panglawas lakip na sa ilang kaalam.

Matud pa ni Jonathan Tumulak, traffic czar sa Syudad nga giandam nila ang recruit dili lang sa panglawas kundi lakip na ang ilang kasuheto sa balaod sa karsada.

Lakip sa ilang training mao ang paghatag og first aid sa mga motorista nga madisgrasya ingon man nag-umol usab sila og grupo nga kamao mo-ayo og sakyanan panahon nga dunay maaberiya nga mga motorista.

Si Mayor Gerald Anthony “Samsam” Gullas niingon nga sila ang mga bag-ong road warriors nga mopatuman sa lagda sa karsada.

“If needed, motabang sad ni sila ug dakop sa mga snatchers ug kung naay magub-an ug sakyanan mutabang sad ni sila sa walay pag duha-duha,” asoy pa ni Gullas.

Sa pagkakaron, ang estado sa CT-TODA naa pa sa usa ka job order. MEL (BANATNEWS)