Unom ka durugista sikop; Bodul-bodul nisiaw na usab

Cebu, Philippines — Unom ka durugista ang nagtingkagol sa detention cell sa Talisay City Police Station human sila nasikop atol sa gipahigayong drug operation diha sa Barangay Tanke, Dakbayan sa Talisay kagahapon sa kadlawon. Unang nasikop atol sa nahisgutang operasyon sila si Brenda Edolan ug Adeliza Mancera. Sunod nga nasikop sila si Isabelo Cabando, Mark Bryan Escalona, Jason Yanong ug Robert Ompad.

Ang mga suspetsado nasakmitan kini og shabu nga gibana-banang nibalor tanan ngadto sa P16,660.

Sa laing bahin, gipahimangnoan sa kapolisan sa Dakbayan sa Talisay ang mga Talisaynon nga kanunay nga magmabinantayon.

Si Police Lieutenant Colonel Gerard Ace Pelare, hepe sa TCPS nagkanayon nga bisan asa nga dapit aduna gyu’y mga tawo nga mapahimuslanon ug dili gyud angayang magkompiyansa. Gisusi karon sa kapolisan sa siyudad ang taho nga nisiaw na usab ang budol-budol nga modus.

Ang mga sakop sa City of Talisay-Traffic Operation Development Authority nakadawat og duha ka reklamo kalabot sa budol-bodul niining semanaha. Giawhag ni Pelare ang mga biktima nga mo-report diha sa ilang buhatan aron makasugod sila og pahigayon og imbestigasyon sa maong insidente. Gipahimangnoan ni Pelare ang katawhan nga likayan ang mga tawo nga dili nila kaila ug dili usab sila mopatuo sa mga haylo niini. ( BANAT NEWS)