Sinas gihangop sa mga taga Tanke

Cebu, Philippines — Gihangop sa mga molupyo sa Barangay Tanke, Dakbayan sa Talisay ang pagbisita ni PNP chief Debold Sinas kagahapon.

Ang mga purok lider nagpasalamat sa gibuhat sa kapulisan sa ilang lugar nga subsob ang paningkamot nga mawagtang ang ilegalista sa ilang lugar.

Matud pa nila nga dako ang kausaban sa ilang lugar sama sa nagkalain-laing tawo nga mosulod ug gawas sa ilang lugar.

“Nindot na gyud kaayo ang balita nga madungog sa Tanke sukwahi kaniadto nga puro bati,” matud pa ni Anjanette.

Si Gina, usa sa mga purok leader nitataw nga naalaan na siya nga asset maong kanunay siya makuyaw-kuyawan. Pipila ka mga kaso sa pagpatay nga nahitabo sa dakbayan mao nga ang mga biktima naalaan nga impormante sa kapolisan.

Kaniadto, bisan mga bata patan-awon ra sa mga drug pushers samtang nagbahig sa shabu diha sa maong barangay. Apan wala na kini mabalik na karon. Si Police Lt. Col. Gerard Ace Pelare, pangu sa kapulisan sa Talisay nahimuot sa mga pamahayag sa katawhan ug nanghinaut siya nga magpadayon na kini hangtud sa hangtud ang kooperasyon sa mga taga Tanke batok sa ilegal nga drugas.

Ang maong barangay usa sa mga gihugopan sa ilegal nga drugas apan tungod sa subsob nga kampanya nanglayas na ang mga tigpasiugda niini.

Si Sinas miadto sa maong barangay  kagahapon aron sa pag turnover sa gipangtukod nga pansayan sa mga molupyo didto.

Tuyo sa maong proyekto nga mahunong na kining mga ubang mga tawo nga magpataka lang og biya sa ilang hugaw bisan asa kay gawas nga hugaw peligro sab kini sa panglawas para sa tanan. Gawas sa Tanke, miadto sab si Sinas sa Dakbayan sa Danao alang sa pagbukas sa bag-ong natukod nga Danao City Police Station.

Si Sinas gidawat ni Talisay City Mayor Gerald Anthony “Samsam” Gullas kauban ang mga opisyales sa siyudad ug kapolisan.

P3.4 milyong shabu

Sa pikas bahin, usa ka construction worker ang nadakpan sa buybust operation sa mga sakop sa Regional Police Drug Enforcement Unit ( RPDEU  PRO7) kagahapaon sa hapon.

Ang nadakpan sa Dela Victoria St. Barangay Poblacion Pardo, Cebu City mao si John Raymond Monterde Torreon  alyas “ Tiban” kinsa nakuhaan og 475 gramos nga gidudahang shabu nga mokabat P3.2 milyones.

Samtang upat sab ka tawo ang nadakpan sa mga sakop sa Pari-an Police Station  diha sa Barangay Day-as sa Cebu City sila si Brenda Nica Paradela, 34,

Donnie Zapra, 34.

Laing nasikop sa mga tinugyanan sa Mambaling Police Station si Warley Tangpus, 42, nasakmitan og 13 ka gagmay ug usa ka medium pack nga gidudahang shabu.

Nadakpan sab sa mga tinugyanan sa Mabolo Police Station si Jhon Michael Estremos, 18, nga nakuhaan og walo ka gagmay ug tulo ka medium pack nga gituohang shabu.

Usa sab ka Orlando Abella Jr., 44, ang nadakpan sa kapolisan sa Compostela diha sa Purok Tamprut, Barangay Poblacion sa Lungsod sa Compostela. –Rowena D. Capistrano ug Romeo Limpangog (BANAT NEWS)