Pagpamakuna hayan mobalik sunod semana

Cebu, Philippines — Gipaabot nga maapud-apod na sa nagkadaiyang lugar dinhi sa Central Visayas karong adlawa ug ugma ang ilang bahin gikan sa gidugang 50 mil ka doses nga Sinovac gikan sa kaulohan.

Kun mahitabo kini mapadayon na ang nahunong nga pagpamakunang gisugdan sa nagkadaiyang local government units lakip na ang Cebu City.

Si Dr. Jeffrey Ibones, pangulo sa Cebu City Health Department miingon nga naabot na sa rehiyon kagahapong adlawa ang maong mga bakuna ug nanghinaut kini nga karong adlawa ug ugma mahatag na ang para sa siyudad.

Kun mahitabo kini, makabalik na sila sa pagpamakuna sa adlaw nga Lunes  (Mayo 3). Ang dakbayan nagsugod na unta og pagpamakuna sa mga senior citizens apan nahunong human nahutdan og bakuna.

Ang sa siyudad na maoy mo-text sa mga senior citizens ug sa mga kwalipikadong magpabakuna. Ang doses sa COVID-19 vaccine nga ihatag sa Department of Health Central Visayas magbase ra sa master list nga giduso sa siyudad sa maong ahensiya.

Sa Mayo 5 magsugod na sila paghatag sa second dose sa Sinovac alang sa mga frontliners.

Base sa datos nga gipagawas sa DOH-7 niadtong Abril 29, 2021 ang active cases sa Cebu City naa sa 812 human dunay napuno nga 51 ka bag-ong kaso apan 64 ang dugang sa mga nangaayo  ug 834 na ang nakalas tungod kay dunay duha nga nadugang.

Sa pikas bahin, napulo  ka mga trabahante gikan sa nagkadaiyang industriya ang moapil sa ceremonial vaccination dungan sa pagsaulog sa Labor Day karong adlawa sumala pa ni Department of Labor and Employment Regional Director Salome Siaton.

Matud pa ni Siaton, ang Industry Tripartite Council nga gilangkuban sa mga nagkadaiyang sektor maoy moduso sa mga pangalan sa mga pabakunahan karong adlawa.

Ang ceremonial vaccination himuon human nga ang Department of Health mipahibalo kanila nga buhaton kini isip pagila sa mga mamumuo sa rehiyon kay giisip sab silang prayoridad sa gobiyerno.— Rowena D. Capistrano