Sekretong prisohan?

CEBU, Philippines — “Secret detention cell” sa sud sa Sawang Calero Police Station sa Cebu City Police Office nga diin giingong gibutangan sa mga mireklamong dinakpan nga sila giabusaran sa mga midakop kanila gisubay sa Commission on Human Right (CHR)-7 kagahapong adlawa.

Gikuyogan sa CHR-7 ang duha ka reklamante ug gitudlo kanila kung asa ang giingong “secret jail” kung diin sila gitanggong sud sa pipila ka adlaw.

“Nia mi dinhi para magsusi sa kaning alegasyon aning secret detention cell,” sigon ni Leo Villarino, Chief Investigator sa CHR-7.

Gigiyahan sa duha ka reklamante sa eksaktong lugar sa maong edipisyo kun diin nahimutang ang maong sekretong lawak, apan wala na kini bungbong ug daw gihimo ng tambakan sa mga damit. Apan nakahinumdom ang duha nga tiles ang sawog sa maong sekretong lawak. Lakip sa nahinumdoman nila nga ilang nakit-an pagusab diha sa maong espasyo ang mga plastic nga lingkuranan nga dunay buslot sa tunga, mga wirings, PVC pipes, ang ceiling fan, ug ang buslot sa bungbong nga matud nila duna kaniadto’y aircon unit.

Nitumaw ang report mahitungod sa “secret detention cell” sa Sawang Calero Police Station sa miaging semana human 11 nila ka mga polis ang girelibuhan human gireklamo og extortion ug rape sa usa ka 35-anyos nga babayeng ilang gidakop didto sa Lungsod sa Minglanilla.

Ang maong babaye mipasangil nga basta lang gironda sa maong mga polis ang ilang balay didto sa Minglanilla ug pugsanon siyang gidala diha sa maong police station ug gi-detain ug gi-torture sud sa pipila ka adlaw.

Sa dihang gibuhian na siya nga walay kasong gipasaka batok niini, gidala siya sa usa sa mga polis ug gipa-withdraw og P170 mil sa bangko nga gikuha sa maong polis ug pagkahuman gidala siya sa usa ka motel ug didto gilugos.

Pagkahuman sa maong polis ayha pa siya gitugotang makauli sa ilaha.

Tungod sa maong reklamo girelibohan ang ilang hepe nga si Police Major Eduard Sanchez aron paghatag og dalan sa imbestigasyon nga himoon.

Human nigawas ang maong balita, daghan pang mga reklamante ang mitumaw ug midangop sab sa Integrity Monitoring and Enforcement Group-Visayas, ang unit sa PNP nga gitahasang moaksyon batok sa mga hiwing mga polis.

Lakip sa giduol sa mga nangangkong biktima sa maong mga polis mao ang CHR-7. Ang duha ka babayeng nikuyog sa CHR-7 sa paginspeksyon kagahapon giingong gipasanginlang nagbaligya og illegal nga drugas, butang nga pareho nilang gihimakak.

Ang duha giingong gidakop sa managlahing mga adlaw ug dili parehas ang gidugayon sa ilang pagkatanggong sa maong sekretong lawak.

Ang usa nila vendor sa Carbon Public Market. Matud niini, unang gidakop sa mga polis ang iyang kapuyo nga vendor sa maong merkado ug pagkahuman gidakop sab siya diha sa C. Padilla Marso 9, 2021 samtang nag-ihap siya sa halin sa ilang tindahan kalit siyang gidakop sa mga polis.

Bisan giunsa niya og esplikar nga halin kadto sa ilang tindahan giinsister gyud sa mga polis nga halin sa illegal nga drugas ang iyang kwarta ug gidala kini sa police station.

Matud pa niini, paglabay sa pipila ka adlaw gibuhian ra siya ug walay kasong gipasaka kanila apan gipangkuha ang iyang cellphone, kwarta ug alahas.

Wala na motugot ang CHR-7 sa mga tigbalita nga tukion ang uban pang detalye sa reklamo tungod kay nagpadayon pa ang ilang imbestigasyon.

Si Cebu City Police Office Director Police Col. Josefino Ligan nihimo sab og surprise inspection sa Sawang Calero Police Station niadtong Huwebes Santo apan wala nila makita ang giingong “secret jail.”

Si Villarino miingon nga kun makakita sila og ebidensiya nga tinuod ang maong “secret detention cell” mag-atubang og dugang reklamo ang mga nalambigit nga mga polis.

Sa pikas bahin, si Police Lieutenant Colonel Wilbert Parila, ang Operations chief sa CCPO mihangop sa gihimo sa CHR-7 ug ilahang paabuton ang pormal nga reklamong ipasaka batok sa ilang mga sakop.

Apil sa ilang gipaabot nga mogawas mao ang imbestigasyon nga gihimo sa IMEG-7labot sa maong insidente. —Rowena D. Capistrano/IBM (BANATNEWS)