Gibalibarang makig-sex manigbas

CEBU, Philippines — Usa ka 56- anyos nga lalaki midunggab sa silingang ginang kay nibalibad sa iyang hangyo nga silang duha maghilawas, nahitabo kini sa bukirang bahin sa Barangay  Dalingding Sur, Lungsod sa Medellin.

Si Police Major Welther Grapa, hepe sa kapolisan sa Medellin Police Station ang miila sa ilang dinakpan nga  mao si Vicente Rondina, minyo ug nagpuyo sa Barangay Antipolo sa nahisgutang lungsod.

Matud pa ni Grapa ang biktima mao ang 45 -anyos niining silingan nga iyang gikainom.  Dihang nangahubog na, gikatahong gihangyo sa suspek ang ginang nga makighilawas kaniya, apan gibalibaran siya niini.

Gikatahong gikasuko kini sa suspek ug mipauli sa ilang balay, apan mibalik dayon ug nagdala na og sundang dayon diretso gitigbas ang biktima sa makadaghang higayon sa kalawasan, bukton ug liog niini.

Dali sab nga misibat ang suspek apan nadakpan sa follow-up operation. Samtang ang biktima gidala sa tambalanan sa Cebu City.

Gitanggong na sa Medellin Police Station ang suspetsado samtang giandam na ang kaso batok niini. —IBM (BANATNEWS)