Unified curfew planong ipatuman sa tulo ka siyudad

Cebu, Philippines — Gilauman nga mopatuman og unified curfew ang tulo ka managsilingang dakbayan nga naglakip sa Mandaue, Lapu-Lapu ug Dakbayan sa Sugbo.

Gibutyag ni Atty John Eddu Ibañez, executive secretary ni Mayor Jonas Cortes nga tukion ang maong plano atol sa ilang tigum karong sunod semana.

Sa pagkakaron ang Mandaue mipatuman og curfew gikan sa alas 11 sa gabii hangtud alas 4  sa buntag, samtang alas 10  sa gabii hangtud sa alas 5 sa buntag ang gipatuman nga curfew sa Dakbayan sa Sugbo ug Lapu-Lapu.

Samtang gitug-an usab ni Ibañez nga ang Dakbayan sa Mandaue anaa pa sa 10 porsiyento nga positivity rate.

Gibase kini sa datus gikan sa Department of Health (DOH) 7 sa Marso 15, 2021 nga ang maong dakbayan adunay 1,175 nga aktibong kaso sa COVID 19.

Suma ni Ibañez nga dili pa makapa alarma ang utilization rate sa mga hospital sa dakbayan ug dili pa usab puno ang mga isolation center niini.

Ang karaang North Bus Terminal sa Barangay Subangdaku wala pa masudli og pasyente sa COVID -19  ug ang nasudlan og pasyente mao lamang ang Norkis Park Isolation Unit ug ingon man ang isolation unit sa Mandaue City Central School sa Barangay Centro.

Sa laing bahin duha ka mga kaoshung bus ang ipahimutang sa may Freedom Park ug M.C Briones aron butangan sa mga tawo nga malapason sa health protocols.

Gipahibawo ni Cebu City Police Office Director Police Col Josefino Ligan nga ang maong kaoshung bus maoy himoong holding area sa mga malapason sa lagda sama sa wala pagsul-ob ug facemask ug uban pa.

Gitug-an ni Ligan, aduna silay kapolisan nga ipakatap uban sa mga force multipliers ug kauban nilang mga ahensya aron hingusgan ang kampanya sa pagtuman sa tanan mga protocols batok sa COVID-19. — Rowena D. Capistrano