11 ka establisamento gipasusi sa EOC

CEBU, Philippines — Gipasusi  sa Emergency Operations Center  ang 11  ka kan-an nga giingong wala  motuman sa lagda ilabi na sa executive order ni Mayor Edgar Labella nga duha ra gyud ka botilya sa alcoholic drinks ang mahimong idalit matag kustomer.

Matud ni Konsehal Joel Garganera ug pangulo sa EOC nga nagpatabang na siya sa kapolisan sa paghimo og balidasyon sa maong report.

Ug kon mapamatud-an nga wala nituman sa lagda ang maong mga tindahan posibleng ipasira ug bakwian sa business permit.

Gibutyag ni Garganera nga duna silay ipahigayon nga mga surpresang operasyon ug nanawagan siya sa store owners nga motuman gyud sa kamandoan sa siyudad.

Si Garganera nga kong adunay inom-inom sa establisamento makapaaghat kini og panagtapok sa mga tawo ug delikado sa transmisyon sa COVID-19.

Sayo pa, adunay mga report nga  giingong ang ubang establisamento nga mamaligya og beer nga gitawag og “by set” diin lapas gyud kini sa duha ka botilya ang usa ka set. —BDB (BANATNEWS)